Vawiin khan Chief Minister Pu Lal Thanhawla kaihhruaina hnuaiah pawngsualtu, abikin kumtlinglo pawngsualtu te chunga hremna lekkawh chungchang Chief Minister Office Conference hall-ah sawiho a ni.

Chief Minister chuan pawngsual, abikin kumtlinglo pawngsual awm thin hi sorkar-in a ngaihmawh avangin pawikhawihtu chu rang taka a phu ang ngeia hrem nise tih an duh avanga sawiho tura kalkhawm an nih thu a sawi a. Chief Minister chuan kan pi pu ten naupang an en thin dan kha a fel tawklo hle a, tuna keini ringtute hian naupangte chu thlamuang tak leh hlim taka an than chhoh theih nan, chanvo leh dikna an neihte kan humhalh sak tlat a tul hle a ni a ti a; the Protection of Child Rights Act 2007 pawh siam that anih thu a sawilang bawk a ni. Pu Hawla chuan sorkar hnathawkte bakah khawtlang tana mi inhmang, social activists ten zalen taka sorkar finchhuah thin turin a sawm bawk a ni.

Law Minister Pu Lalsawta pawhin pawngsual chungchangah mitin kan tan tlan a angai a ni a ti.

Sawihonaah hian zalen tak leh zau takin kalkhawmte hian an duh dan leh ngaihdante an sawi a. Mizoram mihring cheng nuai 10 vel chauh awmnaah pawngsual chanchin hriat tur a awm fo mai chu vanduaithlak an tih thu an sawi hlawm a. Hetiang thil duhawmlo a thlen fo loh nan sorkar chu tun aia khauh zawka dan lekkawh se an ti a; court-ah pawh thuhretu nih hreh lo turin mitinte an chah nghal a ni. Court lama roreltute pawhin pawngsual a awm a, mipui phunnawinate ngawihsan mai lova, pawikhawihtu chu a rang thei ang bera a chungthu ching fela, na thei ang bera hremna lekkawh nise tih chu kalkhawm ten an duh dan a ni tih sawihona ah hian an tarlang a ni.

Pawngsual hi Mizoramah kum 10 chhung, kum 2001 - 2011 (july) thleng khan vawi 635 a thleng a. Hetah hian kumtlinglo chungah pawngsual vawi 336 a thleng a ni.

Sawihona ah hian Law Minister Pu Lalsawta, Parliamentary Secretary Pu Chawngtinthanga, Law Secretary Pu P. Singthanga, Senior Police Officers, Law department officers, prosecution atangin advocate te, department kaihhnawih officers, NGO, khawtlang tana mi inhmang social activists hrang hrangte an tel a ni.