Vawiin chawhma khan Chief Minister Pu Lal Thanhawla hovin a office chamber ah Pu Lal Thanzara, Minister of State leh Power Department hotute nen Power chungchang an sawiho.

Meeting-ah hian Serlui B Small Hydel Project 12 MW pechhuak thei tur siamna man Rs.12 Crore leiba la pek loh awm chungchang sawi hoin, Chief Minister chuan a siamtu contractor M/S BHEL-Mecon in leiba hi sorkarin a pek tlak thuai loh chuan Court a kal mai a tum thu a sawi a. He leiba pekna tur hian NABARD atanga loan lak tum mek anih thu Engineer-in-Chief, Power Department chuan a sawi bawk a ni.

Tuivai Hydro Electric Project, 210 MW pechhuak thei tur,Union Ministry of Finance, Department of Economic Affairs (DEA) ina Viability Gap Funding hmanga Public Private Partnership (PPP) mode anga kalpui a remtih tawh chungchang pawh sawihoin, a siamtu tura thlan ten a siam nana sum an hmuhna turah harsatna a awm avangin an phur loh thu sawilan a ni a. Hei hi DEA tana Pilot Project anih avangin DEA chuan tih puilin ngei anihna turin hma a lak mek thu sawiho a ni bawk. Hetiang hi Tuivai Project dinhmun anih avangin meeting chuan New Delhi ah lo bawhzui turin High Power Team din nise an ti a ni.

Meeting-ah hian Pu Lalthanzara,MOS bakah Pu Lianchungnunga, Secretary, Power, Pu Liannghinglova Pachuau, E-in-C, Power, Pu C.L.Thangliana, Secretary (Power) (Rtd), Pu K Guite, CE, Power, Pu Lalnunmawia,CE (Distribution), Power leh Pu Vanlalhruaia,CE (S/O), Power te an tel a ni