Vawiin tlai dar 4:00 khan Principal Director, Health & Family Welfare Department Office Chamber-ah Health Department Programme hrang hrang Officer-te an thukhawm a. Tunlaia Mizoram hmun hrang hranga Pa leh Bekang eisual avanga thihna thleng te sawi ho a ni a. Hemi kaihhnawiha Health Department hmalakna te thlirho a nih bakah hetiang thil a thlen tawh lohna tura mipui lam zirtir dan tur te pawh sawiho nghal a ni bawk.
He hun hi Dr. K.Ropari, Principal Director, HFW in kaihruaiin Dr. Pachuau Lalmalsawma, Nodal Officer, Integrated Disease Surveillance Programme (IDSP) hnen atangin report ngaihthlak a ni a, Lalsawma Pachuau, Joint Director, Food & Drugs Administration chuan Pa leh Bekang a lo him loh thin nachhan leh a inven dan tur te a sawi bawk. Dr.Pachuau Lalmalsawma, State Nodal Officer, IDSP chuan tun hnaia Bekang eisual avanga nunna channa hmun Bungtlang pawh a hova tlawh a nih thu leh a tul anga hmalak a nih dan te a tarlang a. Tun tuma Sentetfiang khua a Pa eisual avanga thihna thleng pawh a enfiah tura Lawngtlai CMO atanga Medical Team an kal thu te, Medical Team kal te hian an pa eisual sample an lo hawn mek thu leh chu sample chu Mizoram University mithiam ten a rang thei ang bera an enfiah atana tih a nih thu te a sawi bawk.
Health Department chuan thuchhuah siamin Pa hi thil tui tak ni mahse, a variety te, a tona hmun, a lak dan leh a siam dan phung te a dik tawk loh chuan mihring tana hlauhawm tak a ni thei a, chuvangin mipuite fimkhur turin hetiang hian hriattirna an chhuah:
1) Pa reng reng, kawngkam lutuka to te, motor khu leh bawlhhlawh khua bawm phaka awm te lak loh tur.
2) A zung thlenga pawh loh tur. Leiseh chinah chauh lak tur.
3) A thing reng reng ei loh tur.
4) Chhum hma a, hun engemaw chen tuia fai taka chiah hmasak thin tur.
5) Pa hriatchian loh ei mai mai loh tur.
6) Pa chi hrang hrang hrang chhum pawlh hian tur hlauhawm tak a siam theih avangin tih hauh loh tur.
Bekang pawh khawi ami nge, ei atan a him tawk em, dah thatna a rei tawh em, leh a umdan a felfai tawk em tihte hre chiang lo va ei mai mai lo turin mipuite an chah bawk a ni.
Health Department hotu te hian mipuite hnenah nasa lehzuala zirtirna neih a nih theih nan tunlai hian tan an la nasa hle a ni.
