No.7468/2020-2021

Chief Minister Pu Zoramthanga chu vawiin khan CM cabinet meeting room-ah Public Works Department hotute leh Central YMA hruaitute nen inkawmin, Mizoram chhunga kawng siam mek te CYMA in an endik naa an thil hmuh te leh hmalak ngaite an sawiho.

CYMA ten PWD te nen an thawhhona dungzuia Mizoram chhunga kawngsiam endika hma an lakna chu Chief Minister in lawmawm a ti a. Mizoram leh a chhunga chengte tana tangkai tur kawng tha kan neih theih nan YMA chauh nilovin khawtlang leh mipuiin theihtawp chhuaha kan theihna zawn theuhva hma kan lak chu thil lawmawm tak a nih thu Chief Minister chuan a sawi a. Thahnemngai taka sawrkar hmalaknaah thawhpui zui zel turin a sawm bawk a ni.

Pradhan Mantri Gram Sadak Yojana (PMGSY) hnuaia kawng siam CYMA ten an endik chungchangah a tlangpui thuin harsatna awm anga lang chu contractor atanga hna in pek chhawn tam lutuk avang niin a lang a. Hetiang thil hi a thlen tawh loh nan PWD in contract a lo sign pui te chuan an hna chin tha taka specification anga thawk zo tura hrilh an ni a. Chutiang a nih loh chuan contractor te hi 'blacklist' in, Mizoram sawrkar hnuaia hna engmah thawk thei tawhlo a chhinchhiah an nih tawh tur thu vawiin meeting-ah hian sawi a ni.

Additional Chief Secretary Pu J.C. Ramthanga, Engineer in Chief Pu Lalmuankima Henry leh PWD official pawimawhte leh CYMA Office Bearers te vawiin meeting-ah hian an tel a ni.