DIRECTORATE OF INFORMATION & PUBLIC RELATIONS, Government of Mizoram, India

380/2022-2023

Aizawl the 2nd May, 2022: India zalenna kum 75-na lawmna Azadi ka Amrit Mahotsav (AKAM) North East Festival neih mekah vawiin chawhnu khan 'Round- up Session of Roundtable on Untapped Eco-Tourism Potential and Role of Bamboo in the NE Region' chu Dawrpui Multipurpose Centre, Aizawl ah neih a ni. Chief Minister Pu Zoramthanga chu khuallian niin Tourism Minister Pu Robert Romawia Royte chu khualzahawm a ni.

Chief Minister chuan "Introducing Mizoram" tih lehkhabu, Azadi ka Amrit Mahotsav puala NEC leh Mizoram sawrkar (Planning & Programme Implementation Department) tangkawpin an siam chu a tlangzarh a. Handlooms & Handicrafts stall hrang hrang, sawrkar department leh mimal ta he programme pual a buatsaih te chu a tlawh bawk. Thu sawiin CM chuan India zalenna kum 75 na puala India sawrkarin India ram kil tin hmasawnna phochhuak zawnga a lawmna a buatsaih chu lawmawm a ti a. Tun tuma thupui zing ami, bamboo development chu Mizoram mai nilo India hmarchhak state te economy khaichhuaktu pawimawh tak a nih theih thu a sawi.

Tourism Minister Pu Robert Romawia Royte chuan tourism peng hrang hrang - adventure tourism te, religious tourism te, green tourism te, sports tourism leh adangte a hmasawn turin leh thui tak thleng turin theihna (potential) Mizoramin a neih thu te, tihhmasawn zel pawh tum a nih thu a sawi a. Heng atan hian mimal/ pawl atangin phurna awm tura a duh thu leh, chung chuan hmasawnna chak tak a thlen theih thu sawiin, sawrkarin a lo puih zel tur thu a sawi a ni.

Joint Secretary, Ministry of DoNER Pu Saurabh Endley chuan mau pawimawhna thu he hunah hian a sawi a. AKAM NEC Nodal Officer Pi R.Lalrodingi pawhin hmasawnna kawng hrang hrangah Mizoramin theihna (potential) tam tak a neih thu leh heng hmasawnna hna thawhna pui tura NEC a awm thu te a sawi bawk.

Vawiin programme-ah hian Chief Secretary Dr. Renu Sharma chuan kalkhawmte lawmna thu a sawi a. Mizorama sawrkar department hnuaia 'best practices' te thlir ho a ni a. Tourism Director Pu V. Lalengmawia chuan Eco-tourism leh chawhma lama neih zawh Roundtable on Eco-tourism chungchang report ngaihthlak a ni a. Horticulture Department atangin Potential of Bamboo chungchang leh Roundtable on Bamboo chungchang Horticulture Director Dr. Elizabeth Saipari hnen atangin ngaihthlak a ni bawk. Planning & Programme Implementation Department Secretary Pu Lalmalsawma Pachuau chuan lawmthu sawiin hun a khar a ni.

Cultural Show & presentation in a chhunzawm nghal a ni. Naktuk chawhma dar 9 hian "Ailawng to Reiek Freedom Trek" neih a ni dawn.

Attachment