3069/2022-2023

Aizawl, 15.12.2022: Chief Minister Pu Zoramthanga hovin vawiin chawhnu khan CM Conference Hall-ah 'Ruihhlo leh Kuhva' chungchang sawiin an thukhawm. Dy. Chief Minister Pu Tawnluia leh Home leh sawrkar dept dangte atangin leh CYMA hotute an tel a ni.

Meeting-ah hian dan lova kuhva tawlh leh, chumi avanga Mizoram chhunga kuhva hring chingtute harsatna tawh te, tunhnaia CYMA leh Mizoram Police hmalakna te ngaihthlak a sawiho a ni a. Ruihhlo do chungchanga hmalakna te leh harsatna tawh te sawiho a ni bawk.

CM ho a an thutkhawmnaah hian an rorelna chu hetiang ang hi a ni:

1) Dan lo anga kuhva ro leh ruihhlo lo lut te chu dan kalh an nih avangin theihtawp chhuah a man vek tur a ni. Hemi atan hian Police te an indaih tawk loh avangin anmahni pui turinn YMA leh NGO member dangte pawh a tul anga sawm a, thawhho zel ni se tih a ni.

2) Chak zawka hmalak theih nan Task Force tha tak din ni se. Home Department atangin mawhphurtu engemawzat insiamin, NGO atangin engemawzat tel bawk se. A tul a nih chuan department dang atang pawhin telh ni se.

3) Check gate leh duty posts a tam thei ang ber siam ni se. A awm sa bakah a țul angin gate siam belhin, uluk taka vil ni se. Chutah chuan Police te leh NGO te leh, a tul angin Assam Rifles emaw BSF emaw pawh thawhhopui thei turin coordination tha tak neiin kalpui ni se, tih a ni.

CYMA in ruihhlo do beihpui a thlak mekah a remchan dan ang zelin sawrkar pawhin sum a puih ni se tiin vawiin meeting-ah hian sawi a ni bawk.