3070/2022-2023

Dated E. Lungdar, the 15th December, 2022: Vawiin tlai khan Home Minister Pu Lalchamliana, Hrangturzo bialtu MLA ni bawk chuan a bial chhung khua E. Lungdarah Police Beat Post thar a hawng.

A hawnna inkhawm tawi, Beat Post thara buatsaihah Pu Lalchamliana chuan, kan sawrkar tirh khan Mizoram hmun hrang hrang engemawzatah Outpost siam kan rilruk a, mahse sawrkar kalphung ah Home Department in ama thuin Outpost a siam mai theih loh avangin sawrkar kalphung kan ngaihchan a ngai a. Hun engemawchen a la mamawh dawn si avangin tuna kan lo tihtheih chin Beat Post thar a theih angin kan siam ta rih a ni. Vawiina kan hawn tak pawh hi kan duhthusam ni lo mahse mipuiten an mamawhna avangin E. Lungdar leh a chhehvel khuaten tangkai taka in lo hman ka beisei a ni, a ti a ni.

Inkhawm kaihruaitu Pu Stephen Lalrinawma, SP, Serchhip chuan, E. Lungdarah Police Beat Post thar hun rei tak ata mamawhna sawi a ni tawh a, vawiinah a taka tihhlawhtlin a ni ta a ni. A bul tan nan Honourary Head Constable hovin Constable pathum, an vaiin mi paliten an awm chilh dawn a ni, tiin an kalpui dan tur a sawifiah a ni. N. Vanlaiphai Police Station huam chhunga awm anih angin N. Vanlaiphai Station hnuaiah an thawk dawn a ni.

He hunah hian Pu K. Lalngaizuala, E. Lungdar VCP pawhin thusawina neiin, hun rei tak sawrkara an lo dil tawh Police Beat Post thar hawn a ni ta chu an lawm hle tih a sawi a. Kan duh ber chu Outpost a ni a, nakin lawkah sawrkar pawhin Outpost ngei min pek beisei chungin he Beat Post thar hi khawtlang mipuiten theihtawpin kan lo thawhpui dawn a ni, a ti.

He hunah hian Pu Lalthiamsanga, Jt. Secretary, Home Department leh Home Department official pawimawh dangte, Pu Lalmuansanga Ralte, Addl. DC, Serchhip leh E. Lungdar khawtlang hruaitute an tel a, Pu Kaste Romalsawma, SDPO, Serchhip in lawmthu sawiin inkhawm a khar a ni.