3071/2022-2023

Kolasib Dated 15th December 2022: Vawiin khan School of Nursing, Thingdawlah 3rd Graduation Day leh Capping & Lamp Lighting Ceremony hman a ni a, Dr.T.Lalhmangaihi, Principal Director, Health & Family Welfare Department chu khuallian niin Pu John LT Sanga, Deputy Commissioner chu khual zahawm a ni.

Dr.T.Lalhmangaihi, Principal Director chuan Thingdawl khawtlang inphalna avanga School of Nursing, Thingdawl sak a ni ta chuan zirlai hlawhtling tak tak a chherchhuak zel chu lawmawm a tih thu a sawi a, Nursing School chu tihchangtlung chhoh zel a, Mizoram mipuite hriselna kawng a hmasawnna thlentu a nih thuai a beisei thu a sawi. Principal Director chuan Mizote chu dam lo enkawl kawngah ram dang pawh in a rintlak a an nghaih avangin ram pawn leh ram chhungahte Nurse zirchhuak tan hnathawh tur a thahnem thu a sawi a, Nurse tha leh hlawhtling ni tur erawh chuan tawrhchhel leh taimak a pawimawh thu a sawi.

Pu John LT Sanga, Deputy Commissioner chuan Nursing hna chu midangte tan a malsawmna chawp leh chilh a thlen thei a nih angin hna ropui berte zing a mi a nih thu a sawi a, School of Nursing, Thingdawla rim tak a lehkha zir a hun an hman tawhna chu dam lote thalmuan nan leh tanpui ngaite tanpui nan a tangkai tak a hmang turin a chah.

Vawiin School of Nursing, Thingdawl 3rd Graduation leh Capping & Lamp Lighting Ceremony-ah hian Pi Mimi Lalmuanpuii, Tutor-in kalkhawmte lawmna thu a sawi a, Pi Laltanpuii, Principal chuan school dinhmun tlangpui tarlanna hun hmangin zirlai 60 an awm mek thu a sawi. Kum 2021-22 a Mizoram Nursing Council (Board) Exam ah khan 1st year atangin 1st, 7th leh 9th position an la a, 2nd year atangin 5th, 6th, 8th leh 10th position an la a, 3rd year zirlai atangin 1st, 4th leh 7th position la an awm thu a sawi bawk a ni.