3072/2022-2023

Dated Kawlbem the 15th December 2022 : Tukin zing khan Power and Electricity Minister Pu R Lalzirliana chuan Kawlbem Small Hydel Project 2x2 MW, Hydel Division Ngopa chu a hawng.

He hawnnaah hian Power Minister chuan thusawiin Kawlbem Small Hydel Project puitlin a ni thei chu lawmawm a tih thu a sawi a. Power and Electricity Department chu Department pawimawh tak a ni tih sawiin, Department dangte nena an pawimawhna thliarhran theih a ni lo a ti.

Zingkar program hman zawh a nih hnu hian chawhma lamah hawnna inkhawm Kawlbem Eldee Indoor stadium ah buatsaih leh niin, Khuallian ,Pu R Lalzirliana, Power and Electricity Minister chuan Mizoram Sawrkar chuan kawlphetha lama kan intodelh theih nan theihtawpin hma a la a ni, a ti a. Chung hmalakna zinga pawimawh tak Kawlbem 4MW SHP peihfel a ni chu lawmawm a tih thu a sawi. Power Minister chuan Kawlbem Small Hydel Project siam nan hian cheng nuai 4960 hman niin, kumtin kawphetha 6.67 giga watt hour vel zet a siam chhuak tura beisei a ni a; hei hian Mizoramin kawlphetha lei nana sum kan hman ral thin engemawzah min chhawk thei dawn a ni, a ti .

Khuallian chuan sawrkar chuan ni zung chakna khawlkhawma hmang turin project kalpui mek zel niin Hydel project hrang hrang kan ram mamawh phuhruk tur siam turin Central Public Sector Units (CPSU) te nen indawrna neih chhoh mek zel a ni, a ti a. Mizoram a kan nitin kawlphetha hman tam zawk chu State dang atanga chawk luh a ni tih sawiin, kan ram a Hydel potential kan neih te hi hmun sawma thena hmun khat pawh siam thei ila kan ram mamawh zawng zawng a phuhruk bakah state danga hralh chhuah theih khawp kan nei a, chu chu hmasawnna ruhrel dang siam nan pawh a hman theih dawn a ni, a ti.

Kawlbem Small Hydel hi Indoor sub station a ni a, Mizoram hmun danga la hman ngai loh Pelton turbine hman a ni. Project hi Kum 2014 atanga thawh tan niin thawh zawh hun tur a tira ruahman (Target date of Completion) chu March 2017 a ni a, November 2022 khan hlawhtling taka endik niin zawh a ni. Kawlbem Small Hydel Project siam nan hian Estimated amount chu cheng nuai 4960niin, Revised Estimate siam ngai lova thawh zawh a ni .

He Small Hydel Project hawnna puala inkhawm hi Pu H. Lalengmawia, IAS, Commissioner and Secretary Power and Electricity, Mizoram chuan kaihruaiin Dr L Thangmawia MLA, Lengteng Bial chu khualzahawm a ni. Power and Electricity a hotuliante leh sawm bik mi pawimawhte leh khawtlang mipuite he Small Hydel Project hawnna puala inkhawm neihah hian an tel bawk a ni.