3073/2022-2023

Aizawl 15th December 2022: Mizoram Tourism Service Association in General Conference vawiin khan Tourist Lodge Chaltlangah an hmang a, Pu TC Pachhunga, Vice Chairman, Mizoram Tourism Development Board chu khuallian niin Pu Saitluanga, Director, Tourism Department te nen he hun hi an hmanpui a ni. He hunah hian Mizoram hmun hrang hrang atanga Tourist Lodge enkawltute kal khawmin Pu V Lalengmawia, Joint Secretary, Tourism Department atangin fuihna thu te ngaihthlak a ni a, khuallian pawhin thu sawiin Tourism in tun hnaia hma an sawn nasatzia te a tarlang a, mipui dawngsawngtu leh Mizoram hmel timawitu kan nihna angin theihtawp chhuah zel turin kal khawmte a chah bawk a ni.

Covid hri avangin kum 2021 khan conference hi neih a ni tawh lo a. Pi Lalthakimi Pachuau, Deputy Director report tawi pekah covid tuartu ber zinga Department pakhat a nih avangin sorkarah revenue chhung tur pawh kum 2019-2020 khan cheng nuai 305.70 atangin 2020-2021 khan cheng nuai 38.39 leh kum 2021-2022 khan cheng nuai 148.55 ah a tlak hniam thu a tarlang a. Amaherawhchu hri a zia takah chuan kum 2022-2023 (November thla thleng) revenue hi cheng nuai 185.32 lai a nih leh tawh thu a tarlang bawk.

Tourism Department in online booking changtlung zawka a kalpui theih nan, Information & Communication Technology Department atangin training buatsaih nghal a ni a, tun atanga reilote ah Mizoram pumpuiah room booking hi online chauha kalpui tum tawh a ni bawk. Tlaiah intihhlimna leh chawhlui kilho nghal a ni.