Chief Minister Pu Lal Thanhawla hovin vawiin khan New Secretariat Conference Hall, Khatla ah Sansad Aadarsh Gram Yojana (SAGY) leh Swachh Bharat Mission chungchangah Mizoram MP te leh MLA ten meeting an nei.

Chief Minister chuan SAGY a Model Village siam chungchanga a pawimawh hmaasa ber chu baseline survey neih a ni tiin, hetah hian khawtlang mamawh berte thlan thiam a pawimawh hle dawn a ni a ti a. Mipuite inhnamhnawih tira, mipuite nen thawhho tur a ni a ti a. A hranpaa sum dah anih loh avangin hmasawnna scheme kallai atanga ruahmannasiamtur a nih thu a sawi a. Hna kalpuina ah hnatlanga hna thawhna tur chi tam tak a awm thei dawn a ni a ti. Hnampa Mahatma Gandhia’n thingtlang khuate a changkan hun hun chu India ram ram changkan hun tur a ni tih alo sawi thin atanga he programme hi duanchhuah anih thu Chief Minister hian a sawi a ni. SAGY in a tum ber chu kawng engkima hmakansawn theihnaturinhuapzo hmasawnna thlen tir a ni a ti.

Model Village hi kum 2019ah chuan a intahtawlin khaw pathum thlan chhoh tur anih thu Chief Minister hian a sawi a. Kumin 2016 hian a kaihhruaina in a phut angin model village hmasa bera thlan chu peih fel hman tur a ni a ti. Rural Development department chu nodal department anih thu a sawi bawk.

Faina lam Swachh Bharat Mission chungchangah Chief Minister chuan India ram hmun dangte nen kaikhin chuan Mizoram chu a tha viau a ni a ti a. Inthiarna in neilo tam tak an awm avangin local body inthlana ding turte chuan mahni inah inthiarna hmun nei vek tura tih an nih thu a sawi a. Keini chu kan tha viau a ni a ti.Kanla hnufualna erawhchu solid waste managementah a ni a ti a, tankanlak hle angai a ni a ti. Kum kalta nikum khan rampum huapa khawpui fai thlan chhuah 476 zingah 35-na kan nih thu sawiin, tan lak phawt chuan pakhatna kan ni thei a ni a ti a. Mahatma Gandhi paincham kum 150-na kum 2019ah India ram chu ram fai tia puan theih tura hmalak chhoh mek a ni tiin, Chief Minister chuan hemi lama hmalatu bik Swachh Bharat Mission Sub Group, Chief Minister 8 awmna ah a tel thu a sawilang bawk.

Meeting-ah hian PHE, RD leh UD&PA department ten powerpoint hmangin inkaihhruaina leh hmalak turte hrilhfiahna an nei a. Hriatchian leh hriatbelh nei duhten sawihona hun neiin zawhna te an siam bawk a ni.

Meeting hi Chief Secretary charge latu Pu K.Lalnghinglova, IAS in a kaihruai a, Mizoram MP 2 te leh Aizawla awm MLA te an kim hle a ni.