Sports & Youth Services Minister Pu Zodintluanga chuan vawiin khan Bungzung Playground-a Tuipuiral Annual Meet vawi 43-na hawnna ah Khuallian niin, hlawhtling tur chuan atchilh kan neih a ngai a ni, a ti. Minister Zodintluanga hi East Tuipui bialtu MLA Pu T.Sangkunga bakah Sorkar Official thenkhatin an tawiawm a ni.

Tuipuiral khua 19 atanga football leh volleyball inelna neihah hian Minister chuan infiammite chu fuihin, tunlai khawvelah eng kawngah pawh hlawhtling turin tumruhna, taimakna leh atchilh kan neih a ngai a ti a. "Football-ah pawh naupan lai atanga atchilh tlat chuan khawvel hriat a nih theih a, chutiang bawkin zirna lamah pawh atchilh tlattu chuan hlawhtlinna a hmu thin," a ti a ni.

Sports & Youth Services Minister hian nimin (6.1.2016) khan Samthang Community Hall ah Tuipuiral Zirlai Pawl (TZP) General Conference vawi 31-na a hmanpui a. Mizo te'n tihsual kan neih chu zir vak lova pass ngaihsanna leh zir taima tak hmuhhniam tlat a nih thu sawiin Minister Pu Zodintluanga chuan,"Hei hi kan thlak a hun tawh, zirlai nih chuan taima taka zira thildanga inhman loh ngam a hun tawh a, fashion velin a tihbuai zirlai tam tak kan inenlet a ngai," a ti a.

Bialtu MLA leh Mizoram Youth Commission Chairman ni bawk Pu T. Sangkunga pawhin thu sawiin, thalaite tan Sorkarin hmalakna hrang hrang a siam belh thu leh, SSC leh UPSC exam duhte tan Aizawlah Civil Service Coaching Centre siam a nih thu a tarlang a. Mi tumruh leh taima tan chuan hlawhtlinna a awm reng a, Sorkar hna chauh nilovin eizawnna tur kawng tam tak a inhuam tan chuan a awm thu a sawi a. Kum hnih chhung chauhin MYC chuan thalai tam tak India ram khawpuia hnathawk turin a thawn liam tawh thu leh, tunah India ram pawna hnathawk turin thahnem tak a thawn liam leh tur thu a tarlang bawk.

Tuipuiral Annual Meet hi kum 1974 atang khan chawl lovin kum tin neih thin a ni a, Tuipuiral atang hian MPL khel mek player 11 an awm a. TZP hi kum 1986 February ni 9 ah dinin kum 31 na an hmang mek a, khaw 25 huap a ni.

Vawiin vek khan Hlakungpui Archive-ah MInister ho hian Hlakungpui Committee-te nen inkawmna neih a ni a. Hlakungpui hi kum 1996 khan hawn a ni a, hemi tum hian lung pahnih awm sa bakah lung 20 an dah belh a, hla phuah thiam leh thu thiamte thlan dah a ni. Kum sawm dan zelah lung hi dah belhin tunah hian 33 an dah tawha kumin hi kum sawm dan a tlin lehna niin uluk taka an teh hnuin R. Vanlawma, James Dokhuma leh Lalsangzuali Sailo te lung an dah ve leh dawn a ni. Minister hian Sazep, Khuangleng, vanzau khua te a tlawh bakah Vangchhia ah kawtchhuah ropui a tlawh bawk a.Pi pute sulhnu Vangchhe khawtlangin uluk taka an enkawl chu fakawm a ti a, khawdangte tan pawh entawn tlak a ni a ti a. Vawiin tlai khan nikum 2015 a Mizoram harhna NASA tak thlenna hmun Kengkang khua tlawhin sawrkar in kelkang khua a chhawmdawl Dan te a hmunah a en a, naktuk hian Hnahlan khua football tournament a hmanpui bawk ang.