Mizoram Bharat Scouts & Guides State Council Meeting vawiin khan an President Chief Minister Pu Lal Thanhawla hovin a chenna bungalow ah neih a ni.

Council Meeting kaihruaitu Mizoram Bharat Scouts & Guides President Pu Lal Thanhawla chuan Scouts & Guides chu ram tana pawl tangkai tak, khawtlang inkaihhruainaah te, mahni inthununna kawngah te leh aia upa zahna ah te hmun pawimawh tak luahtu a ni a ti a. A chhelai siamthatna kawngah te leh nungcha te, thing leh mau humhalhna kawngah te pawh hmahruaitu an ni thei a ni a ti.

Meetingah hian kum 2011 - 2012 chhunga programme chi hrang hrang an duan lawk, khawvel ram hrang 4 a tel tur zat te, rampum huap programme 37 a tel tur te leh regional leh state levela tel turte tihfel a ni a. Mizoram chhunga state headquarters hmun tur te an sawiho bawk a. Nikum 2010 1st May leh kumin 2011 26th April thlenga an thil tihte report in, hetah hian international event Thailand, S.Korea leh Pune a an tel ve chungchangte, Rampum huapa National Award dawng mi 3 hnena pek te, Himalayan Wood Badge & Pin mi 8 te hnena hlan a nih thu te, World Guiding Centenary Award mi 3 hnena pekte leh puitling leh naupang tana programme chi hrang hrang an neih te tarlan a ni a.Tunah hian Mizoram Bharat Scouts & Guides ah hian Rover 126, Ranger 130, Scout 2695, Guides 3652, Cub 305 Bulbul 526 leh Adult Leaders 297, an vaiin mi 7731 an awm mek a ni.

Attachment

  • Loading attachment...