3829/2022-2023

Aizawl, 14 03.2023: Chief Minister Pu Zoramthanga hovin vawiin khan SEDP Governing Board chuan CM Conference Hall ah family oriented SEDP chungchang an sawiho.

Vawiin meeting-ah hian sawrkar kum thar 2023-24 chhunga SEDP sum hman dan tur sawiho in, tuna beneficiary thlan tawh bak beneficiary dang thlan dan tur te, puihna sem hun tur leh ngaihtuah tur pawimawh dangte sawiho a ni a. Kum 2022-23 chhunga beneficiary chhungkaw 60,000 te hnenah puihna sem chungchangah a installment pahnihna chu a kaihhnawih department te hnenah pek a nih tawh thu report a ni a. Beneficiary te hnena kimchang taka pek thuai a nih theih nan kumin March thla ral hma hian buaipui ngai tur ang zawng zawng chu tihfel tura bawhzui nghal ni se tia rel a ni.

Vawiin meeting-ah hian Deputy Chief Minister Pu Tawnluia, Minister Dr. R. Lalthangliana, Pu Lalchamliana, Pu R. Lalzirliana, Pu K. Lalrinliana, Pu Lalchhandama Ralte, Pu Lalruatkima leh Pu T.J. Lalnuntluanga te an tel a. State Planning Board Vice Chairman Pu H. Rammawi leh Planning & Programme Implementation Secretary Pu Lalmalsawma Pachuau te an tel bawk a ni.