Vawiin chawhma dar 11:00 khan Serchhip DC’s Conference Hall-ah thlakhat awh National School Safety Programme (NSSP) hnuaia Serchhip District chhunga Sensitization Programme kharna hun leh hemi puala intihsiakna hrang hrang lawmman semna hun urhsun taka hman a ni a, Chief Minister Pu Lal Thanhawla chuan khuallian niin he hun hi a hmanpui a, Disaster Management & Rehabilitation Minister Pu C.Ngunlianchunga chu Khualzahawm a ni.

Vawiin inkhawma thusawitu khuallian Pu Lal Thanhawla chuan Serchhip District Bawrhsap leh a thawhpuite leh Tlawmngai Pawl hrang hrangten thawhhona tha tak hnuaia Chhiatrupna laka School naupangte himna tur an ngaipawimawh chu a lawm thu a sawi a, Mizote hi tlawmngai tak kan nih avangin khawtlangah chhiatrupna alo thlen pawha mahni remchan dan ang anga hma la thin kan ni a, hei hi a himloh mai bakah chhiat tawkte tan pawh harsatna tamtak thlen thei ani tih kan hriat a tul a, awmze nei leh mumal zawka chet lak thiam kan zir a hun tawh a, Rapid Response Force tangkaina atakin kan hmu chho zel tawh a, Tlawmngai Pawlte pawhin hei hi hria in ke an rawn pen zel a a lawmawm hle a ni a ti a, veng tinah hetiang lama training chhuak mi panga vel tal nei zel thei ila a that lehzual tur thu sawiin Sawrkar pawhin awmze nei zawka hmalak chhoh zel a tum thu a sawi a ni.

Chief Minister chuan Mizoram chu abik takin Lirnghing leh Leimin lakah kan himlo lehzual a ni a ti a, Sawrkarin In sakna tur atana hmun him leh himlo a chhinchhiah thin a, hei hi ngaipawimawh lovin mi tamtak chuan In an sa lui thin a, engemaw avangin harsatna tawk sela sawrkar bawk an mawhpuh leh thin hi chu a felhlel deuh a ni a ti a, kan him tlanna tura mithiamte rawn chunga Sawrkarin dan leh ruahmanna a siamte hnawksak ti lova, tihlawhtlingtu nih kan zir hi a pawimawh a ni a ti bawk. Chief Minister chuan Private School tamtak hi mi In luaha kalpui an ni a, rikrum thilah leh chhiatrupna thilah pawh naupangte tana himlo tak tak an nih hlawm a, emergency exit te, kangthelhna hmanrua etc. te a awmlo thin a heihi Sawrkarin a ngaimawh hle a, mipui, zirlai nu leh pate leh School neitute pawhin hei hi ngaipawimawhin ruahmanna mumal tak siam se tha a tih thu a sawi bawk a ni.

Khualzahawm Pu C.Ngunlianchunga, DM&R Minister pawhin thusawiin ram a changkang telh telh a, chhiatrupna chi hrang hrang kan hmelhriat belh zel a, khawvel ram hrang hrang a nghawng dan te pawh kan hmu tam zel a, hengte hi kan rama thleng ve thei anih avangin a hmachhawn dan tur ruahmanna kawnga tan kan lak nasat lehzual a tul takzet a ni a ti a, YMA te nen tang tlanga thawhhona tha tak neih zel an tum thu a sawi bawk.

National School Safety Programme (NSSP) hi Sawrkar Laipuiin Chhiatrupna laka zirlai naupangte an nhim theihna tur atana ruahmanna a siam a ni a, India rama State 22 a District hrang hrang 43 a School 8600 ah a bultan nan kalpui a ni a, Mizoramah pawh kum 2012 atang khan kalpui niin Serchhip leh Aizawl District a School 400 thlanchhuahah he programme hi kalpui mek niin Serchhip District bikah chuan School 150 thlan niin pawisa Rs. Nuaih 40,98,900 /- hman ani tawh a ni.

Vawiin inkhawmah NSSP Sensitisation Programme puala Serchhip District chhunga zirlai te intihsiakna chi hrang hrang buatsaiha lawmman dawngtu te hnenah Chief Minister chuan lawmpuina thuziak (citation) leh pawisa fai a hlan a, heng lawmman dawngtute chu :

Vawiin inkhawm hi Serchhip District Bawrhsap Pi Juhi Mukherjee, IAS chuan Mizo Tawngin hneh takin a kaihruai a, Pu C. Lalpeksanga, MCS, Director DM&R leh Pu Zohmingthanga, DEO, Serchhip ten thusawina hun an hmang a, Pu VL Remliana, MCS, Addl. DC in lawmthusawiin hnu a khar a ni.

NSSP Sensitisation Programme kharna hun neih anih zawh hian Sub-Hqrs YMA, Office, Serchhipah Tlawmngai Pawl hruaituten Chief Minister hi kawmin an mamawh leh harsatna chi hrang hrang an lo thlen a, hengte hi Chief Minister chuan a theih ang anga bawhzui sak a tum thu in a chhang a ni.