Chief Minister Pu Zoramthanga hovin Social Rehabilitation Board chuan vawiin khan Sethawn After Care Centre tlawhin, helai hmun leh a chhehvela ruihhlo ngaite enkawlna tur hmunpui, deaddiction, rehabilitation leh aftercare centre dinna tur hmunhma an enfiah. He programme hi July ni 18, 2019 a Chief Minister ho a Social Rehabilitation Board meeting in Sethawn After Care Centre-ah ruihhlo ngaite dah khawmna tur hmun siam a, a hmunhma pawh a rang lama en nise tih a lo rel tawh bawhzuina a ni a. Board Chairman, Social Welfare Minister Dr. K. Beichhua, Vice Chairman Pu K. Liantlinga leh member dangte bakah Kolasib District a sawrkar hotute leh PWD hotute an tel a ni.

Chief Minister chuan "zu leh ruihhlo in Mizoram min run a, theihtawpin sawrkar, kohhran, NGO leh mipuiin do in bei thin mah ila kan ral do hi a chak em avangin ruahmanna thar siam belh a, tang lehzual a kan beih thar a ngai thin a ni," a ti a. Chumi atan chuan pakhatnaah a mamawh ber, ruihhlo vanga tuar damlote chhanchhuah hnapui thawh chu ngaihpawimawh ber an ngaih thu sawiin Chief Minister chuan centre lianpui, mi tam tak dawlzo chu hmanhmawh taka din tul a ti a ni. A sak hna thawh chhungin ruihhlo supply, ram pawn atanga lo lut ti tlem tura theihtawp chhuah a pawimawh tel thu sawiin, chumi atan chuan supply reduction lama thawkte chu tha taka thuam an nih tur thu Chief Minister chuan a sawi. Ruihhlo ngai damlote enkawl an nih rual hian centre an chhuahsan hnuah pawh eizawnna ngelnghet an neih a, an buaina ngaia an luh leh tawh loh nan rehabilitation leh aftercare ngaih pawimawh a nih tur thu sawiin, centre siam dan tur leh a ken tel ngai pawimawh hrang hrangte chu Board member te leh works department lama  mithiamten an la siam tur thu a sawi.  

Chief Minister chuan ruihhlo chu a duhtu an tlem a demand a tlakhniam theih chuan supply pawh thui takin a tlakhniam phah tur thu sawiin, chumi atan chuan tuna Sethawn a inenkawlna centre siam tur hi ruihhlo do kawnga ke penna pawimawh tak a nih avangin society hnatlang anga neih a duh thu a sawi.

Sethawn Aftercare Centre hi bigha 28 bawr vela zau a ni a. Hemi hmun bakah hian a chhehvela sawrkar department hmun remchangte chu an hmalakna lian dallo zawng a he centre hmunhma atan hian luah hawh sak a nih tur Chief Minister hian sawiin, vawiin hian chunglai hmunte chu enho a ni. 

Excise Minister Dr. K. Beichhua chuan ruihhlo do chu thapui nen a beih a tul thu a sawi a. Ramin nasa takin hma sawn pawh ni se hmasawnna rah tlan a chhawmnung zeltu tur thalaite ruihhlo bawih ah an tan si chuan awmzia a neilo a ni, a ti. Social Rehabilitation Board Chairman chuan Board in he hmalakna hi chonaah la in a kal tur thu leh, hlawhtling tur chuan Mizo mipui zavaia tanrualna a pawimawh thu a sawi. 

Vice Chairman Pu K. Liantlinga chuan vawiina Chief Minister ho a ruihhlo ngaite enkawlna hmunpui siamna tur Board member ten tlawh a an kal chu ruihhlo vanga khawlang nun chhe mek siamthatna leh ruihhlo vanga tuarna laka kan talchhuahna tur atana ke penna pawimawh tak a nih thu a sawi a. He hmalakna tihlawhtling tur hian Board memberte zawng zawng leh Sethawn leh a chhehvel a chengte tawiawmna a sawm a ni.

Tun dinhmunah Sethawn After Care Centre-ah hian building dinglai 42 a awm a. Centre a awmte tan hian Vocational training kalpui niin,trade pathum, heng - computer training (ICT), electronics leh automobile ah te hian zirtirna pek an ni. Ruihhlo ngaite enkawlna atan hian Board in ruahmanna a siam chhin zingah OPD, Detoxification Centre, Rehabilitation, After Care leh Skill Training pekna hmun te siam a, hengte hi mi thiamte enkawlna hnuaia kalpui vek tum a ni.