Vawiin khan Chief Minister Pu Lal Thanhawla hovin CMO Conference Hall-ah February ni 8, 2017 a Sorkarin a lo pawm tawh “Solar Power Policy of Mizoram 2017” hnuaia hmalakna te thlirlet a, hmachhawp la awm hrang hrang te sawiin meeting neih a ni.

Chief Minister Pu Lal Thanhawla chuan ram changkang chho zelah kawlphetha mamawhna a sang chhoh zel in, a siamchhuah kawngah pawh leilung hausakna tiriral lo leh boruak tibawlhhlawh lo thei ang ber zawnga hmalak chu khawvelin a ngaihpawimawh em avangin India sorkar pawhin hemi kawngah hian thui takin ruahmanna a siam thu a sawi a. Mizoramin heng kawlphetha thianghlim a ngaih nizung leh thli chakna hmanga siamchhuak tur hian vanneihthlak takin theihna (potential) tha tak a neih thu fiah a nih tak zel thu Chief Minister hian sawiin, technology hmasawnna avangin solar energy siamchhuak tura senso pawh a hautak lo sawt hle a, Mizoram khua zawng zawng kawlphetha a thlunzawm vek tumna kawngah he hmalakna hi a pawimawh hle a ni, a ti a. Hemi kawnga hmachhawp awm te chu hlenchhuah vek a nih theih nan a mawhphurtute, a bik takin ZEDA leh P&E Department-te chu theihtawp chhuah tura a duh thu a sawi bawk.

Vawiin meeting-ah hian Zoram Energy Development Agency (ZEDA) Director Pu David Ramnunsanga chuan Solar Power Policy hnuaia hmalakna awm tawh leh kal mek chungchangah presentation a pe a. National Institute of Solar Energy, Ministry of New and Renewable Energy hnuaia survey in a tarlan danin, ni sat ber laia ni zung chakna hmanga kawlphetha Mizoramin a siamchhuah theih zat chu 9.09 GWp (Giga Watt peak)/ 9090 MW a nih thu tarlangin, he Policy hnuaiah hian kum 2022 ral hma in a lo berah 80MW siamchhuah tum a nih thu a tarlang a. Hemi atana hmalakna pakhatah chuan Sorkar hnuaia Department leh Institution hrang hrang Office builiding –ah ‘Solar Rooftop System’ dah a ni a, hemi atan hian department tin ten anmahni sum theuh an hman a tul dawn a ni. Beisei anga Solar Energy Sysytem hi bun fel a nih theih chuan kum khatah kawlphetha unit 5,890,224 siamchhuah tur a ni a (1kWp SPV power plant in a tlem berah kawlphetha unit 4 zel a siamchhuak chuan), hei hian sorkar sum cheng nuai 212 chuang a hum thei dawn a ni. He Solar Power Policy kalpuitu Nodal Agency chu ZEDA a nih angin, solar power project kaihhnawih reng reng chu ZEDA a kaltlang zel tur a ni.

Vawiin meeting-ah hian Power & Electricity Department, ZEDA leh department dang atanga sawm bikte an kalkhawm a, Pu Lalram Thanga, Principal Secretary to CM leh Pu RL Rinawma , Principal Adviser to CM ten an telpui bawk a ni.