Vawiin khan DC Conference Hall, Mamitah Pu H.Lianzela, Addl.DC tuna DC charge la mektu hovin Mamita India Republic Day, 2018 hman dan tur rela thutkhawm a ni.
Meeting hian India Republic Day, 2018 chu GSA Playground-ah ropui taka hman nise tiin a rel a, chawhma dar 10:00-ah khuallian District Bawrhsap-in hnam puanzar a pawtpharh ang. Hemi ni hian Sorkar Office tinte chu zing ni chhuah hma-a hnam puanzar zar vek tura hriattir an nih bakah hnam puanzar zartute'n zah leh uluk taka zar tura inngen nghal niin, Mamit khawpui chhunga kohhran hrang hrangte hnenah ram hruaitute tana tawngtaisakna nei tura ngen nise tih a ni bawk. Republic Day 2018 lawmnaah hian Parade contingents 15 tel tura beisei an ni bawk.
India Republic Day lawmna neih zawh hian District Hospital, Buannel Children's Home leh Observation Home-te khuallian hian tlawhin thilpek a hlan ang a, hemi zawh hnu Dar 11:30 AM a tan turin sawm bikte pualin DC Complex-ah At Home neih a ni ang.
Meeting-ah hian Mamit-a India Republic Day 2018 lawmna tura Department hrang hrangte mawhphurhna leh chanvo inpek nghal a ni bawk.
India Republic Day, 2018 hman dan tur rela thutkhawmnaah hian Mamit khawpui chhung Department hrang hranga Head of Offices leh tlawmngai pawl hrang hrang hruaitute bakah khawtlang hruaitute an tel a ni.
