No.2485/2021-2022
Aizawl, 5th October, 2021 : Vawiin chawhnu khan Chief Minister Pu Zoramthanga hovin CM Conference Hall-ah State Disaster Management Authority (SDMA) chu an thukhawm a. Dy. Chief Minister Pu Tawnluia, Minister of Home, DM&R, etc. Pu Lalchamliana, P&E Minister Pu R. Lalzirliana leh EF&CC Minister Pu TJ Lalnuntluanga te an tel bawk.

Vawiin SDMA meeting hian Mizorama African Swine Fever (ASF) leng mek chungchang leh hmalak dan tur an sawiho a. Kumin March ni 21 atang khan he hri hi a leng tan nia hriat niin, October ni 4 thleng khan district 11-a chhungkaw 8987 nghawng tawhin, vawk 33,000 chuang an thih tawh thu report a ni a, vawk suat tawh chu 10,340 a ni. ASF natna hi mihring tan hlauhawm loh mahse vawkin an inkaihdarh hma em avangin a kai tawh chuan vawk danga an thehdarh loh nan suat mai thin a ni a. Vawiin meeting chuan he hrileng avanga harsatnate chhawk zangkhai a nih theih nan chak taka sawrkar laipuiah bawhzui turin an rel a ni.

Vawiin SDMA thukahwm chuan State Disaster Mitigation Fund hman dan tur chungchanga rawtna an thlen chu pawmsak in, cheng nuai 25 aia tlem work proposal chu phalna pek a remti a. District tinah Emergency Response Vehicle dah tura rawtna lut chu pawm a ni bawk a. Mizoram State Disaster Management Plan 2021 an draft chu pawm a ni bawk.

Vawiin meeting-ah hian Chief Secretary Pu Lalnunmawia Chuaungo, DM&R Secretary Pu Vanlalngaihsaka leh SDMA member dangte an tel a ni.