Vawiin chawhma dar 11:30 khan Chief Minister Pu Lal Thanhawla hovin CM Conference Hall ah Mizoram State Level Bankers' Committee an thukhawm a, sorkar nena tangkawpa Mizoram hmasawn nana an thawh theih dan tur kawng hrang hrangte an sawiho.

Chief Minister chuan Mizoram-a bank awmte chu sorkar an tawiawmna ah lawmthu a sawi a. Sorkar leh Bank te chu an hnathawh dan hmang inang lo mah se mipui tana thawk an nih ve ve avanga tha taka thawkho a, mipui hamthatna tura hmalakpui ah a sawm a. Mizoram mipui tam takin bank chhawr tur an la neih loh avanga harsatna chi hrang hrang an tawh thin chu hriatpuia, mipui chhawr tangkai theih tura ruahmanna te a remchan anga duang thin turin Bank hotute chu a ngen bawk. Self-help Group leh midangte hnena loan pek tihkhawtlai a ni thin chuan harsatna a thlen thin thu sawiin Chief Minister chuan sorkar ruahmanna te ngaihpawimawh chu Bank te mawhphurhna a nih hre reng tura ngenin department kaihhnawih leh bank te chu inpawh taka hma la tlang turin a chah bawk. India rama technical leh professional course zir nana zirlai harsa zawk ten Educational Loan an lak theih na atana Canara Bank nodal bank-a hman chu SLBC chuan Mizorama thalaite tan schedule bank dangte atang pawha lak theih dan tur ruahmanna siam thei se a duh thu Pu Lal Thanhawla chuan a sawi lang bawk. State hmun kilkhawr zawka chengte tana bank branch hawnsak pawimawh a tih thu leh bank ten dan khauh tak an neih chu zau zawka mipui ten an hman tangkai theih nana thlahdul deuh dan zawn ni se tiin a rawt bawk. Loan rulh that loh a tam thin avanga bank ten harsatna an tawh thin te chu a hriatpui thu sawiin Chief Minister chuan mipui ten loan awmzia leh a rulh pawimawhna an hriatchian chhoh ve zel avanga a ziaawm chhoh zel dante a sawifiah a, mipui tana bank hnathawh dan hmang hre lo mi tam tak an la awm avanga bank chhawr tangkai chin an la tlem thu a sawi lang bawk. Sum peipunna (savings & investment) chungchang pawh mi tam takin an hriat chian tawk loh avanga bank lem hmanga mi tam tak buma an awm thin chu pawi tiin uar lehzuala bank hnathawh dan hmang leh sorkar-in rintlaka a pawm te chungchang kan inzirtir zel tul a tih thu a tarlang bawk. CM chuan bank hotute chu an hmalakna te leh harsatna te sawihova inhmu khawm thin turin a chah a, sorkar-in reilote-a NLUP programme a kalpui tur atan bank services mamawh a nih tur thu sawiin mirethei leh harsa tak tak te tana hma la chhunzawm zel turin bank hotu kalkhawmte chu a chah bawk.

Vawiin Banker's Meeting ah hian Bank hrang hrangte hnathawh dan leh dinhmunte thlirho a ni a, Mizoram chhunga mihring 2000 aia tam awmna khua bank la nei lo Phuaibuang, Sesawng, Baktawng, Khawlailung, Mimbung, Biate, Farkawn, Hnahlan, Tuichawng, N.Thingdawl, Hortoki, Kawrtethawveng, Rajivnagar leh Silsuri te zinga khaw 7 te chu kum hnihkhat chhunga branch an neih theih nana hma la tu turte ruat an ni bawk. Rural Self Employment Training Institute (RSETI) chu 'Multi Disciplinary Training Centre', KVIB, Zemabawk hmunah June ni 1, 2010 atanga tan a nih tawh thu leh mi 14 ten training an beih thu report dawn a ni bawk.

Banker's Meeting ah hian Mizoram hmun hrang hranga Bank hotu te leh Guwahati atangin Reserve Bank of India (RBI) hotute an kal tha hle a, Mizoram Sorkar atangin Chief Secretary leh department kaihhnawih hotute an kal bawk a ni