No.6120/2020-2021

Aizawl 15.10.2020: Vawiin khan Chief Minister Pu Zoramthanga hovin CM Conference Hall-ah Mizo thalaite zinga mahni kutkawih eizawnna, entrepreneurship lama hma an sawn theih nan hmalakna thar siam belh chungchang sawihona neih a ni. School Education Minister Pu Lalchhandama Ralte leh sorkar hotu dangte telin, MEDMOC leh Mizoram University Incubation Centre tangkawpin Mizo thalaite zinga mahni kutkawih, mahni hmanchang hriatna hmanga eizawnna nei thei tura thalaite dinhmun zirchianna “Mapping general enterprising tendency among Mizo youth” chu an thlirho a ni.

He zirchianna atang hian Mizo thalai te hi entrepreneur ni turin theihna an nei tha in, ram hrang hrang nen khaikhin pawhin an score a inang khat viau tih hmuhchhuah a ni a, kum naupang zawkah score a sang zawk bawk a ni.

Chief Minister Pu Zoramthanga chuan eizawnnaah sawrkar hna ngawt chuan kan thalaite a tlin tawh dawn loh thu leh, entrepreneurship tihhmasawn chu thil pawimawh tak a nih thu a sawi a. Hemi atan hian, zirchianna atanga a lan dan angin, zirlai naupang an nih lai atanga a remchan dan anga syllabus ah telh te, training pek thu hlaah pawh awmze nei taka an kum mil zela zirtirna duan te, puitling zingah chuan hman nghal mai theih tur inzirtirna pek a pawimawh thu te a sawi a ni.

School Education Minister Pu Lalchhandama Ralte chuan MEDMOC leh MZU Incubation Centre te zirchianna chu tha a tih thu sawiin, entrepreneur hlawhtling tak an ni ngei ngei dawn e tih nemnghehna a la nih loh avangin kan Mizo thalaite zinga theihna leh thiamna awm hi kaihhruai a, belhchhah sak chu pawimawh a tih thu a sawi a. Zirlaite syllabus a entrepreneurship development telh chu a tangkai hle tur thu a sawi a. Chutihrual chuan school syllabus hi a hma kum a lo duan lawk zel thin a nih avangin ruahmanna felfai tak siam lawk hmasak a tul thu a sawi a ni.

“Mapping general enterprising tendency among Mizo youth” hian Mizoram hmun hrang hranga Higher Secondary School leh College zirlai random a thlan mi 2255 ah zawhna siam a ni a. Tehfung atan mi hlawhtling ten ze inanga an neiha an sawi thin panga hman a ni a; chungte chu Need for Achievement (thil tih hlawhtlin duh avanga nawrtu awm), Need for Autonomy (Mahni ngei a thil tih duhna), Creative Tendency (a nachang hriatna, ngaihtuahna themthiamna), Calculated Risk Taking (risk lak thiam) leh Drive and Determination (anmahni nawr kaltu leh tumruhna) te a ni a. Score hi 30.37 niin, hei hi ram dang nen khaikhin chuan vantlang tak a ni a. Mipa leh hmeichhia khaikhin chuan mipa score hi 30.70 niin hmeichhia chu 30.04 a ni. Kum a lo tam zelin enterprising tendency a tlahniam zel tih hmuhchhuah a ni bawk.

Vawiin meeting-ah hian Chief Secretary Pu Lalnunmawia Chuaungo bakah Planning and Programme Implementation Department, School Education Department, Higher & Technical Education Department, Department of Labour Employment, Skill Development and Entrepreneurship hotute bakah Mizoram University Incubation Centre hotute an tel a ni.