No.6119/2020-2021

Vawiin khan Land Revenue and Survey Board chu an Chairman, Revenue Minister Pu Lalruatkima hovin Land Revenue and Settlement Directorate Conference Hall-ah an thukhawm a. He Meeting-ah hian Vice Chairman Pu Rochhunga Ralte, Aizawl DC Pu R.Lalramnghaka leh member dangte an tel a ni.

Revenue Minister Pu Lalruatkima chuan Revenue Department chu mipui ngheng hnai ber department te zinga mi, a tel loa awm theih loh, hmasawnna hna tam zawk pawh lei behchhan (land based)-a thawh a ni, a ti. Dan dik taka mipui ten ram kan neih theih nan te, mipui sum sawrkar revenue-a chhunluh tur chhiah tam zawk fel fai taka lak a nih theih nan te, ram buai tam tak awm mek chinfel tuma hmalak a nih dan te Minister hian a sawi a. MIRSAC te nena thawk hovin ram thliar fel ‘land zoning’ tih tum a nih thu a sawi lang bawk.

Vawiin meeting-ah hian Expert Committee on Land Reforms in rawtna an siamte chipchiar taka enho a ni a. Expert Committee rawtna engemawzat sawiho a nih hnuah vawiina en kim hman lohte hi Board meeting thutkhawm leh hmasak bera en chhunzawm leh tura dah a ni.

District thar pathum Saitual, Khawzawl leh Hnahthialah te Settlement Officer-ten hna an thawk tan tawh a, surveyor pawh dah vek ni tawhin Revenue Office te heng district tharah hian tha taka an function theih tawh thu sawilan a ni bawk.

LR&S department chuan revenue lakkhawm kawngah tan nasa taka a lak mek laiin COVID-19 hripui leng vangin harsatna an tawk a. Mipuite harsatna hrethiamin LR&S Department chuan hun bituk chhunga chhiah pe hmanlo te late fee chawi belh ngai lovin November ni 30, 2020 thleng chhiah pek hun chhung a pawt sei a ni.