973/2023-2024

Aizawl, 29th June 2023: Tukin khan Chief Minister Pu Zoramthanga hovin Tourism Minister Pu Robert Romawia Royte leh sawrkar department hotu pawimawh thenkhat leh khawtlang hruaitute chuan Zuangtui a FCS&CA godown ah kalin, Unity Mall sakna atana a remchan theih dan tur a thlithlai.

"Unity Mall" chungchang hi kumin February thla khan union budget session ah Union Finance Minister chuan sawiin, tourism leh mahni kutkawih a eizawngte hmasawnna tur atan leh inpumkhatna atan state tin te an capital ah din tum tura tih an nih thu a lo sawi tawh a. Unity Mall hi state tin te an state nihna leh ziarang phochhuak tha thei ber tur thil siamchhuah/tharchhuah (One district, One Product) te, GI product te leh handicraft thilte chawilar nan a tih niin, mall tinah hian mahni state mai bakah ram chhung state dangte thilsiamchhuah theuh pawh pholan ve tur a ni a. Sawrkar laipui chuan a sakna tur cheng vaibelchhe 120 chuang a dah a ni.

FCS&CA Godown hi Sairang Dinthar vengah sawn tura hmalakna kal mek niin, nimin khan kudam thar hi a sakna tur lungphum lo phum tawh a. Sak zawh a nih a suan hunah Zuangtui a Supplies department ram hi mipui tana tangkai thei ang bera hman tum a ni.

FCS&CA hian tun hnaia Manipur buai avanga raltlan te'n an ration card hmanga an chanbual buhfai an lak ngei theih nan hma an la nasa hle a. One Nation One Ration Card hman a nih tawh avangin mahni chen nghehna state lo ah pawh ration lak theih zel a nih laiin Manipur server offline mode ah engemawchen a awm avangin lak lawk theih a ni lo a. Ministry ah te thlen a nih hnu ah tun thla laihawl atang khan raltlante pawh anmahni chanpual ngei ration pek theih a ni ta a ni.