Vawiin chawhnu khan Veterinary and Fishery Board chu Chief Minister Pu Zoramthanga hovin CM Cabinet Meeting Room-ah board hmalak dan turte sawihovin an thukhawm. He meeting-ah hian Board Chairman AH & Veterinary Minister Dr. K. Beichhua, Board Vice Chairman Pu C. Lalmuanpuia, Mizoram State Planning Board Vice-Chairman Pu H. Rammawi leh Adviser to CM Pu C. Lalramzauva te an tel a ni.

Enge Kan target..he board hian enge kan tih tur Kan en anga, chumi atang chuan enge hma kan lak ang tih sawiho ang.

Chief Minister chuan Development Board hrang hrang ten an thil tum leh hmalak dan tur te chiang taka duang a, an thawh tur theuh tha taka thawk hlawm tura a duh thu a sawi a. Mizoram chu ei tura intodelh state ah kan siam tur a ni tiin chumi chuan buh, thlai, sa leh oil a huam thu leh, Veterinary and Fishery Board chuan sa a state a intodelh theih nan hmalak dan tur a duang tur a ni tiin, chumi atana pawimawh hmasa chu ran chaw a intodelh a nih thu a sawi. Chief Minister chuan sa a intodelh tur chuan chhungkhat eichawp te te a mahni remchan dan a vulh mai nilovin, a vulhna hmunpui tur siamin, Mizoram chu a remchan thei dan ang bera area-wise a then hrangin, mipui mamawh dan zirchian hmasak a, chumi mil zel chuan area khat chawm thei turin a bul hnaia ran vulhna siam ni se a ti a. Board chuan zirchianna nei a, a hmun tur te thlang a, ran hrang hrang demand awm dan leh a vulhna atana mamawh te an ngaihtuah tur thu a sawi. Fishery lamah pawh plan mumal tak siamin, sangha bakah chakai leh a dangte pawh mipui atanga demand a awm dan angin tihhmasawn dan tur zawn tel ni se a ti a ni.

Chief Minister chuan Board hrang hrang hmalaknate chu a remchanna apaingah Society anga kalpui tur a nih thu sawiin, department khat chauh emaw hmalakna a nih dawnloh avangin mi zawng zawng hmalakna a nih zawk tur thu a sawi a. Society nena inhrethiam taka thawk hovin, Board in a vision chu society siama chumi kaltlang thawh a nih hnu ah bawhzui leh enzui chu Board kut a nih thu a sawi.

Vawiin meeting-ah hian Board Chairman Dr. K. Beichhua chuan ran lakluh kawngah pawnlam atanga lakluh chu fimkhur a pawimawhzia leh natna laka fihlim tlan theih nan plan siam tel a tul thu a sawi a. Vice-Chairman Pu C. Lalmuanpuia pawhin Board hmalaknaah member te leh a kaihhnawih department te chu inpawh leh inthurual taka an thawhho a pawimawh zia a sawi a ni.