Lawngtlai Bawrhsap Pi Shashanka Ala, IAS chuan tukin khan “Upgradation of Anganwadi Centre” scheme hnuaia thuam that Lawngtlai ICDS Project huam chhunga anganwadi centre thenkhat chu tlawhin, an dinhmun leh hna thawhte a en fiah.

Lawngtlai Bawrhsap hi Lawngtlai CDPO Pi Hlawnchii leh Lawngtlai DIPRO Pu C. Lalhruaitluanga te’n an tawiawm a. Lawngtlai ICDS Project huam chhunga he scheme atanga thuam that anganwadi centre 15 zinga thenkhat – Chawnhu, Bazar-II, Vengpui-C, Lawngtlai-III-A, AOC Veng-II leh Thingkah-II centre te tlawhin, work supervisor-te’n thuam that hna an thawh dan te, anganwadi worker leh helper te’n anganwadi an enkawl dan leh an kalpui dan te a enfiah a. Anganwadi centre chu naupang, raipuar leh nu nau pawmte’n chaw tha an dawnna hmun tur a nih thu sawiin, thawktute chu ni tin hawng a, hunbi fel tak siama ei tur sem ziah turin a chah a. Centre bul hmun awlah thlai ching turin a chah bawk.

Upgradation of Anganwadi Centre scheme hnuaia anganwadi centre thuam that tura thlante hi thuam that nan Rs nuai 2 zel pek an ni a. Thuam that hna hi work supervisor tura thlante kutah dah niin, centre-in a mamawh dan azirin, a chung, a bang, a chhuat, thuk, chhuar, inthiarna leh nutrition vawn thatna thingrem te siam leh chei that a ni.