Vawiin khan Lawngtlai District Water & Sanitation Committee (DWSC) chu an Chairman, District Bawrhsap Pi Shashanka Ala, IAS hovin Lawngtlai DC Conference Hall-ah an thu khawm a, DWSC hnuaia hna thawh hrang hrang an thlir ho.

He hunah hian Member Secretary, PHED EE Er Laltlanchhunga chuan hma lakna kal mek leh hmachhawp awmte a tar lang a. Swachh Bharat Mission (Gramin) hnuaia inelna chi khat, khaw tina faina inzirtirna lam hawi wall painting 4 leh ODF board tar tur chu thawh chhoh mek a nih thu te, ODF Plus hma lakna hnuaiah khaw 65-ah bawlhhlawh paihna leh sawngbawlna hmun (solid liquid resources management) siam zawh a nih tawh thu leh Phase-II-na atan khaw dangah hma lak chhunzawm zel a nih thu te tar lan a ni a. SBM (G) hnuaia khaw awm zawng zawng chu inthiarna mumal nei lo awm lohna (ODF)-a puan vek an nih tawh thu ngaihthlak niin, kumin October ni 2 hmain ODF Plus hnuaia hma lakna pawh zawh hman tum ni se, tih a ni.

He thut khawmah hian Swachh Bharat Summer Internship (SBSI) hnuaia intihsiakna buatsaih chungchang pawh tar lan a ni a. Hemi hnuaiah hian NSS, NYK leh NCC kal tlangin thalaite inziak lutin, khawtlang faina leh thianghlimna atan darkar 50 chhung hna an thawk ang a, selection committee-in a endikna atanga a ti tha pathumna thlengin lawmman an dawng thei dawn a ni. Intihsiakna atan hian July ni 31 thleng hun hawn a ni a, district level, state level leh national level thlengin intihsiakna hi a kal dawn a. District level-ah pakhatnain Rs 30,000/-, state level-ah Rs 50,000/- leh national level-ah Rs nuai 2 thleng dawn theih a ni.