Vawiin chawhnu khan Rural Development Minister Pu Lalruatkima hovin a Office chamber ah Rural Development Department mamawh chungchangte  sawiin Rural Development Department leh Finance Department hotuten  meeting an nei a. Meeting ah hian RD Department atangin Secretary Pu H. Lalhmingthanga, Additional Secretary Pu V. Lalsangliana leh Deputy Secretary Pu C. Lalchhuangkima te an tel a, Finance Department atangin Finance Commissioner Pu Vanlalchhuanga leh Under Secretary Pu Lalnuntluanga te an tel a ni.

Meeting ah hian DRDA hnuaia thawkten hlawh thla tam an lak theih loh chungchangte, Pradhan Mantri Awas Yojana (Gramin) PMAY(G) chungchangte, kum hmasa lamah Budget a tel thin thil pathum kumin Budget a lang ta lo chungchangte, leh MGNREGS sum tang chungchangte leh furpui thleng mek a mipui mamawh phuhruk nan silpauline lei chungchangte an sawiho a ni.

Pu Lalruatkima chuan meeting Agenda-a thil  chhawpchhuah te chu thil hmanhmawh anih avangin RD Department leh Finance Department ten hmaichhana harsatna awmte sawikhawma, heng sutkian nan inrawn chunga, heng harsatna tawh te sutkian dan kawng sawiho tha a tih avanga hmanhmawh taka meeting chu koh a ni tih a sawi.

DRDA hnuaia thawkte hlawh hi Central Sawrkarin kum tam tak an rawn tum tawh lova, a chhan nia lang chu Panchayati Raj Institution hnuaia state dang ah te chuan sengluh an ni tawh a, mahse Mizoramah heng hi a awm loh vangin sengluh an la ni lova, senglut turin State Sawrkar a inbuatsaih mek a, mahse hlawh lak loh thla tam an nei tawh a. A thawktu harsatna tawh ngaituahin an hlawh tur sum chu Finance Department in ngaihtuah sak turin Minister hian a ngen a. Sum mamawh hi vawi leh khata pek mai a harsat dawn avangin he sum hi a tahtawla pek dan ruahman an lo tum tur thu Finance Commissioner chuan a sawi.

PMAY(G) Scheme leh MNGREGS sum lo thleng Finance Department a tang mek te chu a rang lama lehkha tul te kal tira release vat dan tur an sawiho a.  Kum hmasa lama RD Budget a tel thin, kumin Budget a tel ta lo – Housing for Project Staff, Social Education leh Rural Housing Scheme te telh anih leh theih nan allocation an ruahman chin chu an sawiho hnuin hei pawh hi a tahtawla tih nise tiiin an rel a. Hei bakah hian furpui lo thleng meka mipui mamawh phuhruk nan RD Department in silpualine an lei tur chungchangte leh BADP hnuaia Central Sawrkarin project atana sum an release dan an thlak avanga SMS chu Central Sawrkar release ruala release a tul thu te pawh sawi langin SMS chungchanga harsatna awm thin te sutkian dan chungchang an sawi bawk  ni.

RD Department mamawh te hi Finance Commissioner hova RD Department hotu ten an thlir nawm leh dawn a, sum neih dan a zira,  a tahtawlha tih dan tur ruahmanna an la duang dawn a ni.