Chief Minister Pu Lal Thanhawla chuan vawiin khan National Cadet Corps NE Region Additional Director General Maj. Gen. Raju Chauhan hnenah lirthei pahnih (Bolero) thar a hlan. Heng lirtheite hi Aizawl leh Lungleia NCC hmalakna hrang hranga an hman tangkai tur a ni.

Chief Minister Pu Lal Thanhawla chuan NCC hotute hi a kawm naah Mizorama NCC hmalakna hrang hrang bakah Lungleia NCC Battalion siam leh office nghahna tur chungchang te sawihoin, office hmun tihfel a nih tawh thu leh Sports and Youth Services Department thawktute nen enho a hma lak a nih zel tur thu NCC hotute chuan an sawi a. Chief Minister chuan chak thei ang bera hma la turin a chah bawk. CM Pu Lal Thanhawla chuan NCC chu thalaite tan nun kawng dik zawh a mahni invawnna atan leh ram leh hnam hmangaihna kawnga inkaihhruaina tha tak a nih thu a sawi a. Tuna hmalakna thar awm tur hian zau zawka thalaite tan hamthatna leh hmasawnna rahbi a hawn ngei a beisei thu a sawi.

NCC Lunglei Battalion hnuaiah hian Mizoram chhim lam district pali a huam ang a, cadet 3520 an awm thei dawn a ni.

Vawiina lirthei inhlan tak hi sawrkarin loan basis in kum thum (3) chhunga a hman tir niin, 1-Mizo Battalion leh 20-Mizo Battalion, NCC, Aizawl Commanding Officer te ve ve hminga dah a ni.

He hunah hian Principal Adviser to CM Pu R.L. Rinwma; Brig. SK Dey, Group Commander NCC Group HO. Silchar; Col. K.S. Dhindsa, CO 1 Mizo BN NCC; leh Lt. Col. Clement Lalhming Thanga, CO 20 Mizo (l) Coy NCC ten an tel a ni.