Vawiin chawhnu dar 1 hian DC Conference Hall, Serchhipah Mizo Students’ Union, Serchhip District Headquarters chuan kumina HSSLC result chhuaka zirlai ti thate chawimawina hun an hmang a, Pi Sangchhin Chinzah, MCS Serchhip District Bawrhsap chuan khuallian niin a hmanpui.

Khuallian chuan kan dam chhung zawng hian zir tur nei vek kan ni a, mi taima leh tumruhte chauhin hlawhtlinna an chang thin ani a ti. Zirlai kan nih hian kan zirlaibu mai bakah mihring nunphung hrim hrim te pawh kan zir zel a tul ani a ti a. Zirlai pass ve tawk tawk ringawt hi a tawk lova, thiamna tak tak paw chhuak tura school lam leh in lama theihtawp chhuah a tul a ni a ti bawk. Chawimawina dawngtute fuihna thu sawiin, vawiina chawimawi an dawnah hian duhtawk mai lovin, an chawimawina dawn chu anmahni tiphurtu leh an kal zelna atana tichaktu atan hmang tura chahin mahni inthununna kawngah pawh ta la zual zel turin a chah a, faina kawngah mahni hma zawn theuha hma la thar theuh turin a chah bawk.

Vawiina zirlai chawimawina hunah hian kumin HSSLC result chhuaka Serchhip Town chhung zirna in atanga Distinction leh First Divisiona pass te chawimawi niin, mi 51 hnenah chawimawina thuziak hlan an ni a. 2018 HSLC leh HSSLC resulta za-a za hlawhtlinna nei school 3- Govt. Chhiahtlang High School, Govt. JM High School leh Chhiahtlang Higher Secondary School te hnenah lawmpuina thuziak an hlan bawk a ni.

He hun hi Kaleba Zomuanpuia, Treasurer chuan a kaihruai a, R. Lalvenngaia, Secretary chuan report pe in Laldingliana Chhangte, President chuan lawmthu sawiin he hun hi a khar a. Zirlai naupang, zirtirtu leh nu leh pa ten an telpui a ni.