2902/2025-2026

Aizawl the 14th January 2026: Vawiin khan Loch House (Gajraj Hall), Aizawlah Sainik Welfare & Settlement Department bultumin 10th Armed Forces Veteran Day cum Ex- Services Reunion of Mizoram neih a ni a. Chief Minister Pu Lalduhoma chuan a telpui a, Pu K. Sapdanga, Home Minister chu khualzahawm a ni a, Pu TBC Lalvenchhunga, MLA, Adviser to CM leh Lt. Col. Clement Lalhmingthanga, MLA ten Chief Minister hi an tawiawm.

Thusawiin Chief Minister chuan, India ram zalenna sualnaah te, Indopui pahnihnaa India ram venhimnaah te, zalenna kan hmuh hnua indona hrang hrangah te Mizoten kan thawhhlawk ve hle a. Mizo thalai India sipaia tangte hi an awmna hmun apiangah fak an hlawh thin a, kan hmingthanpui hle. Mi tam takin indonaah nunna an chan a, mi tam tak dam takin in rawn pension a. Vawiinah kan ram venhim nana vanglai hun tha hmangral tawh te bula Armed Forces Veteran Day ka rawn tel hi nuam ka ti hle a ni. Ram tana in inpeknateah lawmthu ka sawi a, an nunna hlantu zawng zawngte zahna chibai ka buk a ni, a ti.

Sorkar chuan kan thalaite hi a tam thei ang ber India sipaiah lut se kan duh a, kan theih ang angin hma kan la a. Territorial Army kan din bawk a. Kan thalaiten ngaihven se kan duh hle. Sainik School kan neih chhun Chhingchhip Sainik-a lut duh te pawh hi an tlem riau mai a. Tan kan lak a tul hle a ni, a ti a. Mizoram sorkarin veterans te tana hamthatna a buaipui hrang hrangte a tarlang bawk a.

Chief Minister tarlan danin, financial year kaltaah khan Kum 65 chung lam, sipai bang pension la ve lo te tan sorkar chuan Penury Grant Rs. 49.44 lakh a dil chhuak a, sipai bang fate scholarship tur Rs. 47.4 lakh dil chhuah a ni a, sipai nupui hmeithaite inzirna atan Rs. 2.5 lakh leh sipai bang fanute pasal neih tanpui nan Rs. 4 lakh pek chhuah a ni.

Tun financial year kal mekah hian sipai huaisen chawimawina dawngte lawmpui nan Rs. 16 lakh pek chhuah tawh a ni a, pek tur an la awm zel tura ngaih a ni. Ex- Servicemen Contributory Health Scheme hnuaiah a thlawna inenkawlna hmun atan ZMC & H leh Zemabawk Cancer Hospital chu dah thar a ni a, sorkar hna laknaah 5% reservation siamsak mek an ni. Tunah hian Mizoramah Ex-Servicemen 6170 leh hmeithai (dependent) mi 2483 an awm a. Central sorkar atanga hamthatna an dawn hi kum khatah Rs. 180 crore vel a tling thin a ni.

Thu a sawi zawh hian Chief Minister hian lawmman chi hrang hrang a sem nghal a. A dawngtu zingah India ram sipai huaisen chawimawina sang ber pahnihna Kirti Chakra nikuma dawngtu Captain Lalrinawma Sailo a tel a. Ani hi Mizo zinga Kirti Chakra dawng thei pahnihna niin Mizoram sorkar chuan lawmpuina cheng nuai sawm a pe a ni.

Pu K. Sapdanga, Home Minister pawhin thusawiin, vawiinah hian Mizoram chuan lungawi tak, lungleng tak siin Armed Forces Veteran Day hi kan lawm a ni. Kan sipaite hian nunna aia ram himna dah chungnung zawkin an vanglai leh an thatlai nite an hmang ral a. A then hlim taka an rawn kir laiin a thenin an nunna an hlan a. Ram tana an inpekna hi a hlu kan ti a, kan zahin kan chawimawi a ni, a ti.

Surg. Lt. Cdr. Pu Lalnuntluanga, Director, Sainik Welfare & Resettlement chuan kal khawmte lawmna thu a sawi a, Armed Forces Veteran Day hman a nih chhan tlangpui a tarlang bawk a. Armed Forces Veteran Day hi India ram pumah kum 2017 atang khan hman tan niin ni 14 Jan-ah hman thin a ni a. He ni hi First Commander-in-Chief of the Armed Forces, Field Marshal KM Cariappa OBE, kum 1953-a pension-a a chhuah ni a ni. Kumin Armed Forces Veteran Day hi a vawi sawmna (tenth) niin, Mizoramah chuan kumin hi an vawi thum hmanna a ni.

India ram pumpuia sipai hmunah leh state hrang hrangah Sainik Welfare Department te bultumin a rualin an hmang a. Mahni nunna thapa ram venhim hna thawktute zahna niah te, sipai bangte leh a tanglaite inpawhna tha siam nan te, ram venhimna lama rilru tuaithar nan te hman a ni.