Chief Minister Pu Lal Thanhawla chuan nizan khan Serchhip-a awm mek, 14 Assam Rifles din champhaphak kum 53-na lawmna an headquartera an buatsaih chu a hmanpui.

Chief Minister chuan kumthar 2012 a 14 Assam Rifles in kum 53 na a din champhaphak lo thleng chu a lawmpui thu sawiin, a member leh chhungkaw tinte chu chibai bukin duhsakna a hlanin, a lawmna-a tel ve tura an sawm chu lawmthu a sawi a. Assam Rifles te hi Mizote zingah an mikhual lohzia sawiin, Aizawl khawpuiah phei chuan hai theih rual an nilo a ni a ti a. Mizoram buai laia Mizo mipuiten an nel vak loh thin thu sawichhuakin, tunah chuan hun tha rawn inher chhuakin inpawh taka kan awm thei ta hi thil lawmawm tak a ni a ti. Para Military forcete zinga upa ber, Assam Rifles sipaite hi an chhuanawmin, 14 Assam Rifles Serchhipa awm mek ten mellung pakhat, kum 53-na an hlen hi kan lawmpui takzet a ni Chief Minister chuan a ti a. Hun lokal zel turah an hnathawh ropui tak hi chhunzawm zel a, ram tan hlawhtlinna leh chawimawina hawn belh zel turin a dusakna a hlan a ni.

14 Assam Rifles hi 1st January 1959 khan Lt Col Hoshyar Singh, Military Cross of Rajputana Rifles in Meerut-ah a din a. An hnathawh pangngai, ram ralmuanna vawnhim leh helna tukdaih bakah mipui vantlang hamthatna tur chi hrang hrang, Military Civic Action Programme hnuaiah an thawk thin a. Serchhipa an awm hma hian Nagaland ah te, Manipur leh Tripura hmun hrang hrangah an lo awm kual tawh a. Serchhipah hian May ni 4, 2011 khan an rawn awm ve leh ta a ni. Tunah hian a battalion hi Col.Ratnagar Trivedi, Commandant leh Officer dang 13 ten an enkawl mek a ni.

14 Assam Rifles din champhaphak lawmnaah hian light chi hrang hrang eng hnuai nuam takah intihhlimna chi hrang hrang buatsaih a ni a, zaithiamte an zai bawk a. Kum 53 an tlin lawmna cake Pi Lal Riliani’n a zai a. State hrang hranga an lo awm tawhna kutchhuak thil siam chi hrang hrangte an mikhual tha te hnenah 14 AR hotute hian an hlan bawk a ni. Chief Minister hian 14 Assam Rifles hnenah hian darkhuang a hlan ve bawk a ni.

Lawmna ah hian Chief Minister nupui Pi Lal Riliani bakah Pu Lalrinliana Sailo, Minister for Healh Services leh Pu Zodintluanga, Minister for UD&PA te an tel bawk a. Mizoram Range Hqrs 23 Sector Assam Rifles DIG, Brigadier S.P.Rawat pawh a tel bawk a ni.

Chief Minister leh Minister dangte hian nimin vek chawhnu lam khan Serchhipa hmasawnna hna thawh mekte a hmunah kalin an endik a. Chungte zingah chuan New Serchhipa NBCC in Hall tur an sak mek leh Boxing Hall tur bul tan mek te an en a, Boxing Hall tur hi anih tur ang aphak dawn lova a hriat avangin, Chief Minister chuan remodelled leh nise a ti a. Hengte bakah hian NBCC hmalakna tho, Hmar venga Sports Complex sak mek leh auditotium tur sak mekte an en bawk a ni.