Vawiin khan Art & Culture Minister Pu P C Zoramsangliana hovin a Pisa-ah Memorial Park of Freedom Movement leh  Cultural Heritage Centre chungchangah meeting neih a ni a. He meeting ah hian Pu P L Thanga IAS, Member Secretary, State Planning Board; Pu R Lalvena, IAS, Art & Culture Secretary leh Art & Cuture Department, Finance Department, Planning, Environment & Forests Department, Land Revenue Department aiawhte bakah Mission Foudation Movement hotute an tel a ni.

Pu P C Zoramsangliana chuan Memorial Park of Freedom Movement in a tum ber chu Indian National Freedom Movement-a Mizo Lal leh Pasalthate sulhnu leh chanchin fiah taka tarlan leh hemi Park in khualzin a hip theih nan an chanchin te chu aw leh eng (sound and lighting) hmanga phochhuah a ni, a ti a. Changsil,  Sailam, Alexandrapur-Katlichhera leh Pukpui Darkhuang tlang te chu Mizoram a Chanchin Tha luhna kalkawng anih angin heng hmun te hi chheibawl a, Chanchin Tha in Mizoram a hneh chho dan tarlanna hmun Cultural Heritage Centre tih vuaha buaitsaih chu Project chuan a tum anih thu a sawi.  Hemi Project hi Ministry of DONER chuan ngaipawimawh hle thu meeting ah hian Minister chuan a tarlang bawk a ni.

Meeting-ah hian Project hi a hlawhtlin ngei thei nan, rang taka hmalakna dan tur rel ho anih bakah Project kalhmang duan dan tur leh harsatna awm thei te sutkian dan tur sawiho a ni bawk.