Vawiin chawhnu khan Republic Vengthlang Local Council leh Mizoram Amateur Taekwondo Association (MATA) tangkawp buatsaih ‘15th Official Taekwondo Championship 2012’ chu Hawla Indoor Stadium, Republic Vengthlang-ah Chief Minister Pu Lal Thanhawla’n a hawng a. Taekwondo Championship hawnna inkhawm-ah hian MATA Founder President Pu Laltlankima chu Khualzahawm a ni.

Hawnna inkhawm Organising Committee Chairman Pu K. Lalchhuanawma kaihhruaiah hian Khuallian Chief Minister Pu Lal Thanhawla chuan Mizoram chu kawng hrang hrangah hmahruaitu a nih theih nan sorkarin theihtawp a chhuah mek zel a, Sports-ah pawh chak taka hma lain tunah chuan ram chhung leh pawnah pawh hriattham kan ni ve tan chu a lawmawm tak zet a ni, a ti. Mizo thalaite tan inkhelna hmun tha sorkarin a ngaihtuah sak chho zel a, heng hmun leh a chhehvel te vawn him leh fai taka enkawl hi mitin mawhphurhna a ni, a ti bawk. Sports hian mihring nunphungah invawn thianghlim leh inthununna a tuh theih avangin khua leh tui tha nihna kawngah pawh a tangkai thei a; chhung lam leh pawn lama nun uluk hi a pawimawh a ni tih hre reng tura chahin Taekwondo Championship-a inel tur zawng zawngte duhsakna a hlan a ni.

Vawiina hawn tak 15th Official Taekwondo Championship 2012-ah hian District 6 atangin Team 20 an tel a, an zavaiin Player leh Coach telin Mipa 330 leh Hmeichhia 155 niin Technical Official 20 an awm bawk. He inelna neih chhung hian Category 30 -ah Bout 315 khelh a ni ang a, ‘Champion of Champions’ title fight neih a ni bawk ang. Player naupang ber chu Ruthi Lalhmangaihzuali, kum 3 (10 Kg), Armed Veng ami a ni.

MATA hian member 15000 chuang a nei mek a, kum tin State Championship buatsaihin Seminar leh National level inelnaah a tel thin a. Mizoram sorkar leh Mizoram State Sports Council atanga sum hmuh hmang tangkaiin hlawhtlinna hmel a hmu chho mek zel a ni. State pawn lama a fehchhuah tawhna atangin Gold-142, Silver-121 leh Bronze-169, avaiin Medal 432 an la tawh a ni. Heng zingah hian International medal 16 lai a tel nghe nghe a ni. Tun thla Asian Taekwondo Championship Ho Chin Minh City, Vietnam-a zawh takah khan India aiawhin Mizo player 5 an tel ve a, anni zingah Johnny Lalruatsanga chuan Bronze lain, kum 7 chhung India-in medal a lak loh hnua medal lak lehna chiah a ni nghe nghe.

Mizo zinga World Taekwondo Federation (WTF) Headquarters Kukkiwon member nihna chelh mek te chu :

1. Pu Lal Thanhawla, Chief Minister, Mizoram; 2. Pu Zoram Sangliana, Minister, Art & Culture; 3. Pu Lalfak Zuala, IAS (Rtd), Patron MATA;  4. Pu Rosiama Vanchhawng, IFS, Sr. Adviser MATA;  5. Dr. Rualkhuma Colney, President MATA te an ni.

Attachment

  • Loading attachment...