3378/2023-2024

Dated Aizawl, the 17th January, 2024: Vawiin khan Chief Minister Pu Lalduhoma chuan, Headquarters 23 Sector Assam Rifles ten Mizo thalai, sum leh paia harsate tan a thlawna NEET/JEE entrance test inbuatsaihna coaching centre an kalpui, Sentinel Centre, Zokhawsang a mi chu a tlawh.

Chief Minister hian zirlai naupangte chenna building te, an Kitchen te, an Academic building leh an hmunhma dang te a ensak a, naupangte nen hian thingpui an inho bawk. Inkawmna hun neiin, an nihlawhzia hriaa theihtawp chhuah turin a fuih a. An hnua la rawn zir ve turte tan pawha entawntlak ni tur leh an tum ber NEET/JEE entrance exam paltlang ngei turin a chah a ni. Hetiang coaching centre tha, a thlawna zirna ni bawk an buatsaih avangin, 23 Sector Assam Rifle, NIEDO leh Axis Bank te chungah lawmthu a sawi bawk.

He Centre hi Assam Rifle te hian National Integrity and Education Development Organisation (NIEDO) leh Axis Bank te nena tangkawpa hma an lak a ni a. Kum li chhung kalpui turin ruahmanna an siam a, kum khatah zirlai 30 vel zel lain, mithiam bikten coaching an pe a, awm chilh (residential) niin engkim a thlawnin zirlaite hian an dawng vek a ni. Kumin bikah hian he centre-a luh tumin thalai zahnih chuang ten application an thehluta, an zinga mi 27 te chu lak niin zirna hi an kalpui mek a ni.

Chief Minister hi Major General VK Nambiar, YSM, SM, Inspector General, AR (east), Brig. Girish Upadhya, SM, VSM, DIG, 23 sector, Assam Rifle, Sentinel Centre thawktute leh midangten an lo dawngsawng a ni.