3419/2022-2023
Aizawl, 31.01.2023: Mizoram Horticulture Service Association (MHSA) General Conference vawi 25-na chu vawiin khan Tourist Lodge, Chaltlang ah buatsaih a ni a, Chief Minister Pu Zoramthanga chu khuallian niin a hmanpui. Horticulture Dept. Secretary Pu K. Lalthawmmawia chu he hunah hian khualzahawm a ni.

Chief Minister Pu Zoramthanga chuan horticulture tharchhuah kan tih, thei, thlai, pangpar leh mau te hi state economy tih hmasawn a, hausak theihna khawp tharchhuak tura theihna (potential) Mizoramin a neih thu a sawi a. Chu potential chu haichhuak turin kuthnathawktute kaihruaitu horticulture department te'n pawimawhna lian tak an neih thu sawiin, kan ram hi a nih theih ang ni turin, kawng hrang hranga ramin malsawmna kan dawn te hi haichhuak turin kan theihna zawn theuh ah thawk a, ram hmasawnna atan thahnemngai taka thawh tlan a pawimawh thu a sawi a. Vawiina an thupui thlan "Off Season Cultivation-Harnessing the Untapped Potential" chu tha a tihpui thu sawiin, Mizoram sik leh sa nuam tak, ruahtui that bawknaah chuan enkawl dan thiam tan a hun lo (off season) ah pawh thlai a tharchhuah teuh teuh theih tho avangin hetiang ang zirhona an siam chu lawmawm a tih thu a sawi.

Chief Minister chuan Covid19 hripui len laia Horticulture Department in thei leh thlai hralhna tur supply chain tha tak an siam chu thil fakawm tak a nih thu a sawi a. Thil tharte hralhchhuahna tur market chain siam chu agriculture leh horticulture eizawnna hlawhtlinna atana pawimawh tak a nih thu a sawi a. Chumi rual chuan state pawn a hralhchhuah tum chuan hlawk tham tur tharchhhuah tam tak mihring tha chauh a innghat lo a a remchang apianga khawl hman leh, sawrkar in a thawh chauh a innghat lo a mimal leh pawl anga hmalakna te a pawimawh thu a sawi tel bawk.

Khualzahawm Secretary Pu K. Lalthawmmawia chuan horticulture department officer kalkhawmte chu an hnathawh ah thahnemngai takin, mipui rawngbawltu an nihna hre reng chunga thawk turin a fuih a. 'Sawrkar' chu kan ta a ni tih hre rengin, hlawh leh dan ang taka chanvo chan tur bak beisei lovin, mitin ban phak a awm a, awmna apianga rinawm leh rintlakin sawrkar hnathawk chu a awm tur a ni, a ti a. Ram hmasawnna atana sawrkarin hmathlir a neihte tihhlawhtling tura department in hmachhawp a siamte chu theihtawp chhuah a bawhzui zel ni se tiin thawktute a fuih a ni.

MHSA General Conference 25-na hi an President Pu T. Liankunga chuan kaihruaiin, department Director leh Adviser ni bawk Pu C.H. Lalmuanpuia chuan member tharte a lawmlut a. Kum hnih chhunga an member boral ta mi pahnih sunna hun vice president Pu L. Lalhmingmawia Pachuau kaihhruaiin hman a ni bawk. GS Pu Lalremruata hnen atangin secretary report ngaihthlak a ni a. Conference thupui "Off Season Cultivation-Harnessung the Untapped Potential" chungchangah Thingdawl Centre of Excellence Project Officer Pi P.C. Lalnghahsangi hnen atangin presentation ngaihthlak a ni a. Chawhma hun hi assistant secretary Pu Manthanga Tohhawng chuan lawmthu sawiin hun a khar a ni. Rorel leh hruaitu thlanna in chawhnu hun hman a ni.

MHSS member zawng zawng hi tun dinhmunah mi 58 an ni a. MHSA chuan kum 2021, May ni 21 khan Zoram Medical College (ZMC) ah damlo leh thawk tute ei tur thei thahnem tak an pe a. Helai hun hi COVID-19 avanga dawr leh bazar te an in hawn mumal theih lo lai a ni.