3418/2022-2023
Aizawl, 31st January, 2023 : Chhiatrupna lian tham lo thlen thulha felfai zawka chetlak dan enchhinna “Mega Mock Drill” naktipa neih tur atan vawiin nileng khan State/District Disaster Management Authority, Aizawl leh National Disaster Management Authority (NDMA), Ministry of Home Affairs, Government of India te tangkawp huaihawtin mawhphurtu te hmalak dan tur inhrilhhriatna Table Top Exercise chu Assembly Conference Hall ah neih a ni.

Table Top Exercise-ah hian Dr Renu Sharma, IAS, Chief Secretary, Brig. BS Thakar (Retd.), Consultant Grade-II, (ME&IRS), NDMA, Home Commissioner Pu H. Lalengmawia, DM&R Secretary Pi K. Lalrinzuali, Incident Response System (IRS) hnuaia mawhphurhna nei officer hrang hrangte an tel a, online (video conferencing) hmangin Lt. Gen. Dyed Ata Hasnain (Retd.), Member, NDMA leh Mizoram district hrang hranga District Disaster Management Authority member te an tel bawk a ni.

Table Top Exercise hawnna inkhawmah Chief Secretary Dr Renu Sharma, IAS chuan innlawmna thu sawi pahin SM&R Department leh SEC, SDMA hmalakna chin hrang hrang a tarlang a, Mizoram chu a leilung a la naupan avangte, neo-tectonic activity a nasat vangte, tlang ram awih tak tak a nih vangte, fur ruahtui a tlak tam vangte leh ram leilung kan hman dan him lo (unplanned and improper land use practice) avangte hian khuarel chhiatna leh mihring siam chhiatrupna chi hrang hrang laka him lo tak zet a, hetiang din hmuna kan din avang hian mock drill neih hi a pawimawh em em a ni a ti a. Mock drill hlawhtling taka nei tura theihtawpa inpuahchah turin mawhphurtu official-te a chah bawk a ni.

New Delhi atanga video conferencing kaltlanga Table Top Exercise chhimtu Lt. Gen. Dyed Ata Hasnain (Retd.), Member, NDMA pawhin thu sawiin chhiatrupna hi engtik lai pawha tawng thei kan nih avang leh a rawn thlen thut thut thin avangin kan inpuahchah that a pawimawh a, huai tak leh rilru fim taka hmachhawn thei turin kan inbuatsaih a tul a ni a ti.

Table Top Exercise-ah hian DM&R Department in Mizoram State Disaster Management Plan (including ERSS, CAP and IDRN) sawifiahna powerpoint presentation an nei a, anni bakah hian Kolasib DDMA leh Siaha DDMA ten an District Disaster Management Plan powerpoint presentation an nei bawk a. National Centre for Seismology (Govt. of India), PWD Mizoram, H&FW M izoram, Mizoram Police leh 1st Bn NDRF, Guwahati atang “Resourse mobilisation and Mobilisation Plan” power presentation pek a ni bawk.

Brig. BS Thakar (Retd.), Consultant Grade-II, (ME&IRS), NDMA kaihhruaiin Table Top exercise session hn ih neih a ni a, zawhna leh chhanna hun hman a ni bawk a ni.

Ruahman lawk dan chuan naktip February ni 2, 2023 (ningani) hian Mizoram District headquarters zawng zawngah lirnghing lo thlen thulha felfai zawka chetlak dan enchhinna “Mock Drill” neih tur a ni a. Aizawl khawpui bikah chuan hmun hrang hrang 6 ah Mock drill hi neih a ni dawn a, a tan tirh chawhma dar 10:00 ah Aizawl bawrhsap pisa atang ralkhel dar (siren) tihrik a nih dawn avangin mipuite chi-ai lo turin DM&R department chuan ngenna a siam a ni.