Mizoram Home Guards 29th Batch Recruit Volunteers te chuan an training zovin nimin khan Central Training Institute (C.T.I.), Sesawng-ah Passing Out Parade an nei a. Mizoram Chief Minister Pu Lal Thanhawla bakah Ministers, Parliamentary Secretaries, MLAs, Mizoram DGP Pu Lalrokhuma Pachuau leh sorkar officials engemawzatin he hun hi an hmanpui a ni.

 

 

Khuallian Chief Minister-in Parade Inspection a neih hnuah Home Guards Volunteers ten rinawmna thutiam an la a, march past salute a chhan hnuin Chief Minister chuan thu sawiin 29th Batch Volunteers zawng zawngte chu chibai a buk a, duhsakna sang ber a hlan a ni. Home Guards te dinhmun sawiin “volunteers” an nihna leh Mizo tlawmngaihna a inmilzia thu leh venhimna hna emaw chhiatrupna a thlen chang pawha Home Guards-te chu sorkar leh mipuiin  rinrawl berah an neih thin thu Chief Minister chuan a tarlang a. Home Guards volunteers puitling tharte chu sorkarin an dahna hmun apiangah rinawm leh taima takin, mahni inthunun leh zahawm takin an hna thawk turin a chah. Mizoram sorkar pawhin Home Guards te harsatna hre reng chungin an hmasawnna leh hamthatna tur kawng hrang hrang a ngaihtuah sak mek thu Chief Minister chuan a sawi a ni.

Chief Minister chuan training chhunga mimal ti thate hnenah lawmman a sem nghal a, chungte chu :

1. Commandant General Trophy for        -     GM Lalfakzauva
    Best All-rounder
2. Dy. Commandant general Trophy        -     GM Malsawmzuala
    for Best in Shooting
3. Commandant, CTI Trophy for        -     GM H. Laltanpuia
    Best in Drill
4. Senior Staff Officer Trophy for        -     GM Biaknema
    Best in Discipline
5. District Commandant Trophy for        -     W/HG Laltlanthangi
    Best in Turn Out

29th Batch Home Guards Recruit Volunteers te hi nikum 17 November 2008 atang khan C.T.I. Sesawng-ah training an nei tan a. An training chhung hian an duty-naa tangkai tur ngaihtuahin syllabus-te pawh siam rem ve zel a ni a. Subject hrang hrang - Physical Training (PT), Drill (with & without arms), Battlecraft, Field Craft, Fire Fighting, First Aid, Disaster Management bakah 7.52mm SLR leh No.1 MkIII(.303) Rifle-ah te Weapons Training leh Field Firing neihpui an ni a. Platoon 6-ah in thenin, intihsiakna hrang hrang te huaihawt sak an ni thin bawk. Damlohna leh harsatna avangin an zinga mi 6 te training zo thei lo tel lovin nimina Passing Out Parade hmang thei ta te chu an vaiin mi 172 - Mipa 147 leh hmeichhia 25 - an ni a. Heng Recruits Pass-Out te chu tun atanga reiloteah an duty-na tur lam an pan nghal dawn a ni.

Nimin vek khan Passing Out Parade hun a hman zawhah Chief Minister chuan CTI, Sesawng hmuna ram buailaia nunna chante hriatrengna ‘Martarte Thlan’ cheithat mek chu a tlawh nghal a ni.