Mizoram Middle School Hindi Teachers’ Association te chuan vawiin khan Chief Minister Pu Lal Thanhawla chu a office-ah hmuin an pawl harsatna hrang hrang te an thlen.

 

Hindi zirtirtute chuan an service chungchangah kawng hrang hranga rahbeh bik nia an inhriat thu sawiin an Rescruitment Rule duan that mek chu a hma thei anga tihfel sak turin Chief Minister hi an ngen a. Centrally Sponsored Scheme hnuaia awm te an leave leh pension benefit ah an service chhiar tel sak tur te, Teachers Award dawng tur thlanah Hindi zirtirtute telh an nih ve theihna tur te, Hindi zirna chawikan nan Hindi Directorate hrana din thuai a nih theihna tur te in Chief Minister chu hma la turin an ngen a ni.

Chief Minister chuan Hindi Directorate hran dilna chu ziaka thehluh a ni tawh tih sawiin Hindi zirtirtute chu an harsatna sutkian dan kawng sawiho turin hun remchang hmasa berah Education department hotute a ko dawn tih a hrilh a. India rama chengte tan Hindi thiam a pawimawh avangin Mizoram sorkar pawhin Hindi zirna leh Hindi zirtirtute chu a ngai pawimawh hle dawn tih a sawi bawk a; hmanhmawh lova, dawhthei taka sorkar hmalakna lo ngaichang turin HIndi zirtirtute chu a chah a ni.

Middle School Hindi Teachers’ Association te hi an President Pu C.Darlianthanga’n a hova.  An pawl hmingin Pu Lal Thanhawla chu Chief Minister a nih lawmpuina thuziak leh an Treasurer Pi Lalengzami lehkhabu ziah, “Hindi Guru” tih chu an hlan nghal bawk a ni.