Nimin chawhnu khan Serchhip Bawrhsap Pisa kawttualah Line Department - AH&Vety Department chuan 3rd & 4th Phase hnuai NLUP beneficiary  zinga vawknote 6 theuh vulh tur dawng tura thlan te hnenah vawknote an sem a. Hemi puala vantlang inkhawm tawi chu Serchhip DC's Conference Hall-ah neih niin Chief Minister Pu Lal Thanhawla'n a hmanpui a ni.

Chief Minister Pu Lal Thanhawla chuan mirethei leh chhumchhia te chawikanna programme, NLUP ang a la awm loh thu a sawi a. NLUP tan an tumin central sawrkarah pawisa an dil thu leh Central sawrkarin tha a tih em vanga an dil zah lethnih chuang zet a sum a lo pe hial tih a sawi a ni.  Sawrkar in theihtawpin mi harsa leh rahbi tleu tawhte chawikan a tum laiin thahnem ngaihna chang hrelo tam tak an awm chu pawi a tih thu a sawi a. Mihausa te an harh huna ranvulh an uar hunah sing tel an vulh a nih chuan tuna tanna chang hre lo te chu chung mi te hnuaiah an inhlawh a ngai ang tih a hlauh tih  sawiin sawrkar tanpuina dawngtute chu an harh a ngai a ni a ti. Chief Minister Pu Lal Thanhawla chuan line department te chu, " NLUP programme tihlawhtlingtu in nih hi kan duh a kan phut che u a ni', a ti a . " Kuthnathawktute leh beneficiary te pawh mihausa in singtel ran an vulh hma leh huanthlai siam te an luhchilh hma in inhlawhtlin khalh hi a hun tak zet a. In hlawhtling hman lo anga, mi hausa hnuaiah in kun leh ang tih ka hlau tak zet a ni", a ti.

NLUP chu mi rethei leh khawsak harsa zawkte zawngchhuaktu programme a ni a, rim taka thawk thin te tana hlawhtlinna kawng leh kuthnathawktuten anmahni khawbu zawla mihausa te tlawn lova an intodelh theihna tura ruahmanna leh chhanchhuahna programme a ni tih a tarlang. Chief Minister chuan sawrkar hnathawk, a bikin NLUP line department te chu a lo sawi fo tawh angin Office a hun tam zawk hmanglo tur leh an beneficiary te tlawh ngun a, an harsatna te sutkianpui tur leh an hlawhtlin dan tur ngaihtuahpui turin a chah nawn tih a sawi a. Beneficiary te pawh sawrkar hnathawk leh mithiam zawkte thurawn awih tur leh zawm turin a chah a ni.

3rd & 4th Phase hnuai NLUP beneficiary  vawknote dawngtur zat chu mi 8163 an ni a. Mi pakhat in vawknote 6 zel an dawng dawn a. Vawknote 48,978 mamawh niin vawknote pakhat man hi Rs.5000 a ni a, a pumpui atana vawknote leina man tur zat chu Rs.24,48,90,000/- niin serchhip District bikah hian beneficiary 459 thlan an ni. Tun dinhmunah Kolasib leh Champhai District ah te vawknote hi sem tawh a ni a, vawknote semchhuah tawh zat chu 48,978 a ni.

Attachment

  • Loading attachment...