Nimin khan Nehru Yuva Kendra Sangathan (NYKS), Mizoram Zone buatsaihin NYKS State Director office, Dawrpui, Aizawlah "Rajbhasha Hindi Karyashala" (official language Hindi workshop) neih a ni a. Workshop hi NYKS State Director Pu SR Bishnoi chuan a kaihruai.

He workshop-ah hian District Youth Coordinator, Lawngtlai Pi Mercy Sellate; UNV/District Youth Coordinator, Lunglei Pu Zomuana; district hrang hranga NYK volunteer-te leh sports & youth services department-a adventure hotute an tel a. Hindi pawimawhzia inzirtirna hun hmangin, Dr VR Ralte leh Ms R. Lalthlamuani, Associate Professor, Mizoram Hindi Training College te thuziak zir ho a ni.

Mizoramah hian sawrkar laipui department leh public sector office 50 vel a awm a. He'ng office-te hian India Danpuiin a phut angin kum tin official language pawimawhzia inzirtirna workshop an buatsaih thin a ni.

NYKS hi sawrkar laipuia Ministry of Youth Affairs & Sports hnuaiah awmin, ram chhung thalaite khua leh tui tha ni tur leh mahni intodelh tura thiam thil siam chhuah training hrang hrang pe thintu a ni a. Mizoramah hian district hrang hrangah NYKS volunteer 70 vel an awm mek a ni.

NYKS Mizoram Zone hian S&YS Minister Chairman-na hnuaiah State Advisory Board neiin, district-ah chuan DC Chairman-na hnuaiah annual programme duan thin a ni a. District level mai bakah, international level thlengin programme neih a ni thin.