Vawiin chawhma khan Lunglei District Sanitation Task Force chu an Chairman Lunglei DC, Pi Lalzarmawii kaihhruaiin a office chamber-ah an thukhawm a. UD&PA Department buatsaih ‘Mizoram Khawpui Fai Inelna-2017’ thlirletna neih a nih bakah Cleanliness Year (2^nd October 2017 atanga 2^nd October 2018) leh faina kawnga Sawrkar laipui hmalakna Swachh Survekshan hnuaia hmalak dan tur te an sawiho a ni. Meeting-ah hian a kaihhnawih sawrkar department hrang hrang, tlawmngai pawl aiawhte leh khawtlang hruaitute an tel a ni.

Pi Lalzarmawii chuan UD&PA Department buatsaih  ‘Mizoram Khawpui Fai Inelna-2017’ ah Lunglei khawpui pahnihna kan ni chu a lawmawm takzet a ni tiin “Kan zavaia kan inpekna leh thahnem ngaihna avangin he lawmman hi kan dawng thei a ni” a ti a. Faina kawnga hmasawn zel turin mitinin tan kan lak a tul a ni tiin Lunglei DC chuan hmalak tul a tih hrang hrang member-te a sawipui.

Pu Andrew Lalhruaia, DUDO, Lunglei District chuan UD&PA Department, Government of Mizoram chuan 2^ndOctober 2017 atanga 2^nd October 2018 chu Cleanliness Year ah a puan thu kalkhawmte a hrilh a. Mizoram Sawrkarin Faina Kum a puan chhan ber chu mipuiten faina leh hriselna kawngah pen khat tal a hma an sawn theih nan te, Swachh Bharat Mission thil tum hrang hrang tih hlawhtlin nan te leh mipui mimir ten fai duh tak tak na thinlung anlo neih chhoh theih nan a ni, a ti a.

Vawiin meeting ah hian Cleanliness Year leh Swachh Survekshan 2018 atana inpuahchah dan tur tlangpui te sawiho niin tuiluankawr tihfai tul, khawpui hmun hrang hranga retaining wall hnawih var (white washing), khawpui chhunga vantlang bawlhhlawh bawm dahna tur te sawiho a ni a.

Swachh Survekshan 2018 hi sawrkar laipui hmalakna niin India ram puma Statutory Towns 4041 te faina leh thianghlimna kawngah an inel dawn a, Sawrkar laipui atanga endiktuten mark an pek atangin Khawpui fai Ranking siam a ni ang.