Border Security Force 42 Bn din champha, 49th Raising Day lawmna Tuirial airfield-a vawiina neihah Chief Minister Pu Lal Thanhawla chuan a hmanpui.

Chief Minister chuan BSF 42 nd Bn in kum 49 na a rawn hmang chho chu a lawmpui thu a sawi a. Kum 49 hun chhung hi rei tak a ni tiin, hemi hun chhunga ram tana an thawhna leh an inpekna nasa tak avanga chawimawina te leh lawmpuina tam tak an dawnnaah, an hotu officer-te leh a sipai jawans te chu a lawmpui a ni, a ti a.

Chief Minister chuan BSF hi ramri veng himtu an nih bakah, thenawm ram atanga hel pawl India-a rawn luhruk tumte lo dangtu, vantlang leh khawtlang tana thil sual drugs leh silai tawlhruk tumte lakah leh smuggling laka khua leh tuite min veng him tu an ni tiin, an huaisenna leh inpekna hi a chhuanawm tak zet a ni a ti. Chief Minister chuan BSF ten tualchhung mite nena inlaichinna tha leh thawhhona boruak tha an siam thin chu fakawm a tihthu a sawi bawk a. Vawiin an din champha lawmnaa India rama hnam hrang hrangte lam leh zai an entir chu ram inpumkhatna tinghettu anih ngei a beisei thu a sawi bawk a ni.

42nd Bn BSF hi a din tirh 1st September 1965 atang khan chawimawina hrang hrang 58 a dawng tawh a.Kum 2003 - 2007 chhunga Jammu & Kashmir-a an awm chhunga hnathawh that avangin BSF Bn zinga lawmman sang “Director General Banner 2007” hlan alo ni tawh a, “Shourya Chakra” chawimawina pek a ni bawk a ni. Kum 2012 November thla atang khan International Border veng turin Mamit district pum leh Lunglei district chhung thenkhatah venhim hna an thawk bawk a ni.

BSF Unit te hi Pu U M Subramani, DIG, Aizawl enkawlna hnuaia awm an ni.