Vawiin khan 64th All India Cooperative Week puala Cooperative Society member te intawhkhawmna hun chu Registrar of Cooperative Societies leh Mizoram State Cooperative Union(MSCU) te tangkawp huaihawtin Assembly Annexe Conference Hall-ah neih a ni. He hun hi Chief Minister Pu Lal Thanhawla'n a hmanpui a ni.
Chief Minister Pu Lal Thanhawla chuan Cooperative Movement chu Mizote tan thil thar a nih loh thu leh India ramin cooperation huangah hma a lak hma pawhin, "Hnathlang leh Mizo tlawmngaihna kaltlanga thawhhona te leh midangte nena inpeizawna khawsakho, tanpui ngaite tanpui, sem sem dam dam eibil thi thi tih kan lo nunpui te kha", Cooperation movement thiltum pawimawh tak a ni sa hrim hrim tih a sawi a. Hmalakna kawng tinrengah tanrual leh thawhhona chu hlawhtlinna a nih thu sawiin Bank leh sum puk tur pechhuak thinte tan pawh pawl leh society anga intelkhawmte puih chu thilawlsam a ni a. Hmasawn tuma tanlak duh sum hlawm nei si lo te tan society a mi dangte thawhpui chu kawng awlsam zawk a ni a ti. "Mizo society phei chu 'Closed-Knit' a ni a, tanrual leh thawhho thiamsa kan nih angin India ramah Cooperation movement hlawhtlinpui ber kan nih theihna turin daltu kan nei lovin ka hria a, kan thlenchina kan hlawhtlin leh hlawhchhamnate zirchianga kan inenfiah a pawimawh piahlamah, society a rawn luh belh zel, milehkhathiam zawkten tan inlak phawt chuan Cooperative society huangchhungah mai nilo Mizoram tan hlawhtlinna liantham zawk a awm ngei ka ring a ni", a ti. Chief Minister chuan, "Pathian in khawvela sik leh sa thatberna, thlai chitinreng thatna hmunah min dah tih kan hriat a ngai a, kan ram leilung hauhsakna erawh keimahni haichhuah chawp tur a ni a. Heng kan hnathawh tur zawng zawngah leh kan hmachhawp te tihlawhtling tur pawh hian cooperative movement-ah hian kan hlawhtlin a pawimawh hle a ni", a ti a. Cooperation Movement Mizoramah a hlawhtlin leh zual zawk theih nan Cooperation a thawk leh society member zinga Cooperation kalpui dan hrechiang deuh zawk te chu la hre ve lo te leh mipui nawlpui hnenah zirtirna leh inkawhhmuhna nasa zawka kalpui turin a chah a ni.
Cooperation Minister Pi Vanlalawmpuii Chawngthu pawhin Cooperation Department hnuaia hnathawkte leh Cooperative Society member zawng zawngte chu thathar chhuaha, tunhma aimaha nasa zawka tan la turin a fuih a; Sawrkar atanga tanpuina beisei reng nih tum lova sawrkarah pawh sum chhunglut hial thei tura tanlak chu society member te rilru puthmang tur a ni a ti. Cooperative Society hmalakna huangah tupawh tanlak tum a piang an len vek thu sawiin sum lama pachhe zawk leh khawsak harsa zawk tan pawh Cooperative society a tel ve chu hmasawnna kawnga bultanna remchang tak a nih thu a tarlang a ni.
64th All India Cooperative Week puala inkhawm hi MSCU President Pu Lianthangpuia'n a kaihruai a; he hunah hian Chief Minister Pu Lal Thanhawla'n MSCU -Souvenir a tlangzarh a, Coperation Minister Pi Vanlalawmpuii Chawngthu in MSCU Bye-Law a tlangzarh thung a ni.
