3045/2024-2025

Dated Champhai, the 16th November 2024: Vawiin khan Chief Minister Pu Lalduhoma chuan an nupaa  lehkha a lo zir tawhna thinna Govt. Gandhi Memorial High School (GM H/S), Champhai, kum 75 tlin lawmna lungphun a hawng.

Lungphun a hawn zawh High School Museum, kum 1968 a din, Mizorama Museum hmasa ber a tlawh a, chumi hnuah an school hmunhma te fang lehin zirlai naupangte nen inkawmna hun an hmang zui a ni.

Chief Minister chuan, hlim taka ka lo kal ve tawh thinna high school, Mizorama Museum hmasa ber neitu ni bawk ka han fang leh a. Thil tam tak min hriatchhuahtirin, ka lung a tileng hle. Kum 1965 ah he schoolah hian pawl 8 ka zir a, 1966 ah ram a lo buai a, rammu turin ka chawlhsan leh rih a. Taksa lam harsatna avanga ka chhuah leh hnuah kum 1970 khan pawl 10 zir turin ka lut leh a, tha takin ka pass ta a ni. A sir maiah PUC kha night shift a awm avangin hlo thlo chungin ka zawm ve leh hman bawk.

He school-a ka kal lai hian Mizo Union Block thalai hruaitu ka ni a. Mathematics ka thiam avangin Headmaster Pu Thanseia khan nitin Rs. 10 hlawhin Mathematics zirtirtuah min chhawr thin. Mizoram UT inthlan hmasa ber 1972 a Mizo Union an sawrkar khan Chief Minister Pu Ch. Chhhunga khan min la thla ta a ni.

GM High School hi tun dinhmun ka thlen theihna tura min chhertu, thil tam tak ka zir chhuahna a ni a, engtiklaimahin ka theihnghilh thei tawh lo. Chief Minister-a lakluh ka nih ni pawh khan pawl 10 ka classmate zawng zawngte ka sawm a, a hnuah Chief Minister chenna inah inhmuhkhawmna hlimawm tak kan nei leh bawk. Kan zirpuite hi a hnu zela kan thian tha ber ber te an ni zui thin a, vawiina zir mek te pawhin thian tha tak tak siamna hmunah lo hmang rawh u. Mizorama High School hlun ber pakhata kal thei in ni hi in vannei a, in hmaa kal tawh mi hlawhtling tak takte hnungzui thei turin lo bei sauh sauh ang che u, tiin naupangte a chah a ni.

Zirnaa hlawhtling turin school luh tirh phat atangin mar tha takin, hahthlak lutuk si lovin zir nghal ila, exam dawna beih vak ngai lovin tha takin a pass theih. Chu chu ka lehkha zir ve thin dan a ni. Nitin tlem tlema chaw kan ei reng avangin kan lo thanglian thin a, thawk khata chaw ei nghek erawh chu thihpui a hlauhawm zawk a ni, tiin lehkha zir dan tha a hrilh a. Mi hlawhtling tak tak lo chherchhuak tawh he High School hian mi hlawhtling dang tam tak a chherchhuah zel ka beisei a, duhsakna ka hlan a ni, a ti.

Zirnaah kan zain kan hlawhtling vek thei lo, chutianga harsatna kan lo tawk a nih pawhin kan beidawng mai tur a ni lo. Pathian min pek theihna hlu tak tak dang kan lo nei thei. Zirnaa thleng sang lem lo mi hlawhtling tak tak khawvelah an tam em em a, tih tur leh thawh tur dang hi a tam lutuk a ni. Kan flagship scheme Handholding pawh hian chutiang mi, theihna leh thiamna kawng dang nei si te tan remchang a siamsak dawn a ni, a ti.

Inkhawm hi Pu HT Vanlalsawma, Headmaster chuan a kaihruai a, School hian Chief Minister hi chawimawina lo hlanin, hun chep taka kara Lungphun a rawn hawnsak avangin lawmthu an sawi a ni. Tunah hian zirlai naupang 232, teaching staff 14 leh non teaching staff 1 an awm mek.

GM H/S Platinum Jubilee lawmna pui ber hi karleh ni 21-22 khian he school-a lo zir chhuak tawh Home Minister Pu K. Sapdanga hova hman a ni ang.