3046/2024-2025

Aizawl, 16.11.2024: NEEPCO Ltd. in thlatin Tuirial HEP Power hmanna bill pangngai ni lo, Supplementary Bill, Shortfall Energy bill ₹ 102 Cr lai Mizoram Sorkar a thing chungchangah Mizoram Sorkar in a khinlet dan tur relin vawiin Ni 16, November, 2024 khan P&E Minister ho in a chenna inah meeting neih a ni.

He bill tam tham tak lo kal hi dan hnuaia ennawn tha leh turin Chief Minister Pu Lalduhoma leh Power Minister Pu F Rodingliana ten lehkha mai bakah hmaihma ngeiah Central Power Minister an sawi pui tawh a. Hemi thu kal zel ah hian Ministry of Power chuan hemi chung chang liau liau sawi tur hian a kaihhnawih (stake holder) hrang hrang te Ni 24th September 2024 khan Delhi ah a lo ko khawm tawh a, Heti chung hian NEEPCO Ltd hnen atanga dawn short fall bill hi power leina ba tihlanna PRAAPTI portal ah a la chuang reng avangin hemi chungchang ngaihtuah hian vawiin ni 16, November, 2024(inrinni) khan P&E Minister ho in Finance Department leh Law & Judicial Department hotute nen meeting neih a ni. He meeting hian Power lei leh hralh chungchanga thubuai leh hlabuai ngaihtuahtu Central Electricity Regulatory Commission (CERC) hnenah zualko ni se tiin a rel ta a ni. Hemi atana thil tul te chak tak buaipui nghal ni a ti a. He harsatna hi CERC hnena thlen anih chuan a vai a a ngaihhnathiam loh pawhin nasa takin a tih tlakhniam ngei beisei a ni. He Shortfall bill hi khinlet anih loh a, November thla chhunga ngei pek tlak anih loh chuan CERC lam hian Mizoram a thunun/regulate dawn a, CERC in a regulate chuan Mizoram Sorkar in power a hralh chhawn(power trading) khapsak in thil dang tam takah a khuahkhirh dawn a ni.

He shortfall energy bill hi NEEPCO hian kum April, 2019- March, 2024 chhung a Tuirial HEP in Power a siamchhuah tur zat ruahmansa a siamchhuah theihloh avanga Mizoram Sorkar a rawn bill a ni a. Amaherawhchu CERC Regulation a a inziah dan in kum khat chhung bill chu a kum leh ah zel chauh an bill tur anih lain NEEPCO hian kum 5 chhung bill a siam hi CERC Regulation bawhchhiatna ni a hria in Mizoram Sorkar chuan a khinglet dawn ta a ni.

P&E Minister kaihhruai meetingah hian Finance Commissioner, P&E Secretary, Law & Judicial Department Secretary bakah official pawimawh dangte an tel a ni.