3047/2024-2025
Aizawl, 16.11.2024: Manipur tualchhung buaina kal zelah tun hnaia buaina chhuak avanga hliam tuar leh nunna chan engemawzat an awm hi Mizoram Sorkar chuan pawi a ti hle a. Tun hnaia buaina avanga hliam tuar leh nunna chante leh an chhungte zawng zawng Mizoram Sorkar chuan a tuarpui tak zet a ni.
Manipur tualchhung buaina hian kum khat leh thla ruk zet a awh tawhin mipuiin nasa takin an tuar a. He buaina avang hian Manipur atangin Mizoram chhungah sahimna zawngin mi engemawzat an rawn lut a, Mizoram Sorkar leh mipui ten theihtawp chhuahin anmahni chhawmdawl hna an kalpui bawk a. He buaina avanga kan unaute chhawmdawlna lo pe thin tute chungah hian Mizoram Sorkar chuan lawmthu a sawi tak meuh a. Buaina hi a tawp theih nan Central Sorkar leh Manipur Sorkar te chu theihtawp chhuaha hma la chhunzawm turin Mizoram Sorkar chuan a ngen bawk a ni.
Tunhnaia Manipur buaina kaihhnawihah tumahin Mizoram chhunga hnam leh hnam inhmelmakna tichhuak thei tur zawnga hma la lo turin Mizoram Sorkar-in mitin te a ngen a. Mizoram chhunga hnam dang, a bik takin Manipur state a mi te himna turin Mizoram sorkar chuan hma a la zel dawn a. Chutiang bawkin Mizoram pawna cheng Mizote, a bik takin Manipur-a zirlaite leh hna thawka awm te himna turin Mizoram Sorkar chuan hma a la chhunzawm zel dawn a ni.
Issued by: Home Department, Govt. of Mizoram
