2982/2023-2024

Dated Aizawl, the 9th December, 2023: Vawiin chawhma dar 11:00 khan Chief Minister Pu Lalduhoma chuan Mc Donald Hill, Zarkawt a a office a luah lut a, Mizoram Kohhran Hruaitu Committee (MKHC) OB te, Mizoram People's Forum (MPF) OB te bakah Cabinet Minister leh Minister of State te leh Chief Minister nupui fanauten an telpui.

Chief Minister hi Pu K. Lalthawmmawia, IAS, Commissioner & Secretary to Chief Minister leh a thawhpuiten an lo dawngsawng a. A hmasa berin an chenna tur CM Bungalow a fang kuala, chumi hnuah a office chamber-ah a lut a ni. A pisa dawhkanah a hmasa ber atan Information & Public Relations Department atanga file pawimawh lokal chu a sign a, Office luahluh hunserh CM Conference Hall ah buatsaih zui a ni.

He hunah hian Pu Lalduhoma chuan, "Pathian leh mipuite zarah sawrkarna kan han kalpui dawn ta a, ka bultanna ni, office ka luahluh niah thlarau lama kan puithiamten min telpuiin tawngtaina te min neih sak se kan duh a ni" tiin a pisa thar luahluh nia puithiamte a sawm chhan a hrilh a. Inthlan hma leh a zawh fel hnuah pawh kan thawhpui mi tam takten kan sawi fo chu 'kan sawrkar chuan Pathian hnena lawmthu sawina, sual thupha chawina leh inhlan tharna i nei ang u' tih hi a ni. Hei hi kan rilruah a lian hle a, Pathian awmpuina nen ngeia sawrkarna kalpui kan duh a ni, a ti.

Rev. Lalramliana Pachuau, General Secretary, MPF chuan hunserh hmangin Sam 106:3 "rorêlna vawng thate chu an eng a thawl e, Englai pawha fel taka titu nên" tih thu leh Thufingte 16: 6-7, "Zahngaihna leh thutakin khawlohna chu tlenfai a ni a, LALPA tihnain miin sual a kalsan thin. Mi, a awm danin LALPA a tihlawm chuan, A hmêlma nên lam inremin a awmtir thin" tih thute a chhiar a. Pathian tihna nena bul kan tan phawt chuan he sawrkar hi a kal sual dawn ngai lova, Lalpa tihna avangin thil dik lo chu i kalsan ngam zel ang u, tiin a sawm a. 'Sawi zung zung lova, thawk mawlh mawlh zawk turin kan beisei che u a ni' a ti bawk. Sawrkar thar chu MPF aiawhin lawmpuina a hlan a, Pathian thuchah tawi a sawi zawh hian urhsun takin Chief Minister leh sawrkar thar tan tawngtaina a nei a ni.

Hunserhah hian kal khawmten an ngaihpawimawh zawng thil hrang hrangte an sawi a, hlim takin hun an hmang a, Rev. Zionvarmawia Fanchun, Administrative Secretary, LIKBK in malsawm tawngtaiin hunserh a khar a ni.