2017/2026-2027

Dated Aizawl, the 1st September 2026: Vawiin khan Chief Minister Pu Lalduhoma chuan CM Conference Hall-ah Pi Lalnunmawii lehkhabu ziah, "A tur a na tawh lo ve" tih chu a tlangzarh.

Thu sawiin Chief Minister chuan, Pi Lalnunmawii'n ngawlveite enkawl hna kum 26 zet a thawh hnua ruihhlo dona kawnga a tawnhriatte atanga lehkhabu hlu tak a buatsaih hi a lawmawm a. Ruihhlo do zui zel tura a inpekna thute a lehkhabuah hian a hmuh theih a. A ngaihsanawm hle a ni. 'A kal tawhten a kawng chin an hria' tih thufing ang deuhin ani hian ngawlveite chin a hria a, a lehkhabu hi ngawlvei mekte, an chhungkua leh ruihhlo do hna thawktuten chhiar vek thei ila kan hlawkpui hlein ka ring.

Ruihhlo do hi sawrkar pawhin a ngai pawimawh a, YMA te, kohhran te leh NGO hrang hrangte nen nasa takin hma kan la a. Supply reduction lamah leh Demand reduction lama kan hmalaknaten rah tha a chhuah zel a, ruihhlo pawh a vang chho mek niin kan hria.

Ruihhlo hi nghei theih a ni tih hi kan inzirtir thar a tul a. Sim tum tak takte chu sorkar pawhin kawng hrang hranga chhawmdawl a inpeih reng a ni. Hulhhliap Short Stay Centre-ah pawh ruihhlo nghei chauh zirtir lovin mahnia kea an din zui theih nan skill training kan pe tel a, an zinga mi 21 phei chu Handholding Scheme atangin CM Special Package kan pe tawh a ni. After Care Service lam kan uar hian ruihhlo ti thin, Home-a lut a, an chhuah hnu rei lo tea ti leh mai zelho hi kan sim hlentir theiin kan ring a ni, a ti.

Inkhawm hi CYMA President Pu R Lalngheta'n a kaihruai a. Pu Lallawmzuala Hauhnar chuan lehkhabu thlir lawkna a nei a. Lehkhabu ziaktu Pi Lalnunmawii'n lehkhabu a ziah dan tlangpui a sawi bawk.