2018/2026-2027

Aizawl, 1^st Sept, 2026: Vawiin khan Health Minister Office Chamber, MINECO-ah Mamit, Lawngtlai leh Lunglei District-te tana hman tur Electronic Vaccine Carrier 30 (sawmthum) chu SELCO Foundation chuan Health department changtu Minister Pi Lalrinpuii kaltlangin Mizoram sawrkar hnenah an hlan.

He hunah hian Health department changtu Minister Pi Lalrinpuii chuan thusawiin, SELCO Foundation-te hian health centre 530 laiah solar energy an dah sak tawh a, Aizawl-ah 10 MT walk-in cooler an siam sak tawh bakah, vawiinah Electronic Vaccine Carrier 30 lai, district 3-te hman tur an pe leh ta chu lawmawm a tih thu a sawi a. Heng EVC-te hi Health & Wellness leh Sub-Centre-te awm lohna hmuna nu leh naupangte tan hri laka himna leh hriselna thlentu a nih ngei a beisei thu a sawi bawk.  

Minister chuan Mizoram chu tlangram a nih avangin hmun kilkhawr leh tlawhpawh harsa tak takte a awm thin tih sawiin, heng EVC-te hi darkar 35 chhung 2°C–8°C inkarah vaccine-te a vawn that theih avangin, hmun kilkhawr zawk a awmte tan a hun taka vaccine an lak theih nan a tangkai hle dawn a ni a ti a. Minister chuan health department hmalakna thenkhat pawh tarlangin HPV Vaccine immunization chu state pumah 100.4% lai an ti hlawhtling tawh tih a sawi a. Health department hotute chu theihtawp chhuah a, tanla zel turin a fuih bawk a ni. 

SELCO foundation-in Mizoram sawrkar an hlan tak EVC-te hi ken kual awlsam leh  zangkhai, solar hmang niin, pakhat hi cheng nuai 1 leh sing 5 man lai a ni. 

Vawiin a inhlanna hun hi Health & Family Welfare Dept. Commissioner & Secretary Pi Lalzarmawii chuan a kaihruai a, SELCO Foundation atangin technical report ngaihthlak a ni a. Health & Family Welfare  Department hotute, State Immunisation Team leh SELCO Foundation aiawhte bakah mi pawimawh dangte chu he hunah hian an tel a ni.