Chief Minister Pu Lal Thanhawla chuan vawiin khan Vanapa Hall-ah Aizawl City College Joint Students’ Union (ACCJSU) General Conference vawi 1-na a hmanpui.

Chief Minister chuan Aizawl ah college 10 vel awmin joint students’union an din chu a nachang hriatthlak in, a hmasawn thlak a, a lawmawm hle a ni a ti a. Mizote hi hnam tlemte kan ni a, hmasawnnaah pheikhai rual taka hma kan sawn a pawimawh a. Thawhhona tha te, tanrualna tha te, inhriattawnna tha leh inlungrualna tha te hi zirlaite tan hamthatna a ni a ti a. Zirlai pawl, MZP leh MSU te hian zirlaite hamthatna tur kalpui se kan duh ber a ni tiin, a hruaitu thenkhatte erawh hi chuan politics kailawn ah an hmang ta mai em ni tih tur khawpin an awm thin a ni a ti a. Zirlaite hamthatna tur an kalpui chhung chuan sorkar ang pawhin kan thawhpui thei a ni a ti a. Politics khelh nan an hmang anih chuan kan inhmachhawn a tul ang a ti.

Chief Minister chuan zirlai kalkhawmte chu nakina an inchhir lohna turin an hun tha hi hmang tangkai a, ‘zirlaite hi nakina ram hruaitu tur an ni’ kan tih thin hi a thlen dikna turin khawtlang, kohhran leh ram tana mi chhawr tlak ni turin, an zirlai chu taimakna leh tumruhna nen zir turin a fuih a. Ram hruaitu nih tling tur chuan nu leh pa thuawihte, aia upa te zah thiam, mahni inthunun thei leh mi intodelh nih te a ngai a ni a ti a. Zirlaite chu High school an nih atanga nih tum bik, ambition an nei a ngai a ni tiin, Pu Hawla chuan college zirlaite chu puitlin lam pana kal an ni tawh a ni a ti a, an hun tha neih hi tha taka hmang turin a chah a ni.

Chief Minister chuan Mizote hi a hlanga kan awm avangin saptawng leh hindi tawngte hi hnam dangte aiin kan thiamlo bik a ni a ti a. Manipur mite, Naga te leh Arunachal mite chuan tawng hrang hrang an hman avangin tawng tualleng ah saptawng emaw hindi emaw an hmang a, an harsat lemlo a ni a ti a. Chuvangin India ram zau zawka thawk thei tur leh central service a lut thei tur te in saptawng leh hindi kan thiam a tul a ni a ti. Tuna central sorkar chelhtu BJP phei chuan lehkha an rawn thawnte hi hindi a ziak vek te a ni tawh thin tiin, hengte hi reilote a zirlaiten an tawn tur anih avangin saptawng leh hindi hi thiam nal tura hmang hnem turin a fuih a ni. Chief Minister chuan Mizoramah chuan sorkar hi hna siamtu lian ber a ni (biggest employer) a, hna a tawt tawh avangin a quality zawngin a kal dawn a, chhawr tlak thiamna neite chauh tan hna a awm thei ang a ti a. Chuvangin thalaite tan ‘skilled development’ hi sorkarin a ngaipawimawh hle a ni a ti.

Students Union hruaituten tribal scholarship a Mizoram sorkarin 10% a tum ve tur pe tura an sawi chhangin, Chief Minister chuan ‘Scholarship vanga lehkha zir in nilo’, puitling tur leh ei leh bara intodelh tura zir in ni a ti a. Inhlawhfa chunga lehkha zir hram hramte hi mi zahawm an ni tiin, zirlai tam tak hian an nu leh pa te mittui tlakna siamin, sum lakluh piah lama puk chunga lirthei leh thawmhnaw man tam tak tak lei tir kan awm thin hi a pawi hle a ni a ti a.Scholarship sorkarin 10% a tum ve tur chu Assembly a budget pass anih hnuah pek an ni ang a ti. School timing tih danglam thu ah inhlawhna hun tam zawk siam duh vanga tihdanglam a nih thu a sawi bawk.

Chief Minister hian ACCJSU in College Principal-te theuh chawimawina thilpek an buatsaih, citation a hlan vek a. ACCJSU hian Chief Minister chu thilpek an hlan bawk a ni.

Conference hi ACCJSU Vice President Ricky Lalchhandama’n a kaihruai a, President Rodingliana chuan an pawlin college mal ina a khawih theih loh thilah hma ala thin a ni a ti a. Zirlaiten dan hriat loh avanga zirlaite an buai thin avangin conference thupuiah “Law for Youths” an hmang a ni a ti a, chawhnu session ah pawh dan zirhona an nei zui bawk a ni.

Attachment

  • Loading attachment...